Parlamentu Nasionál Sei Rona Entidade Hotu Molok Halo Revizaun Bá Konstituisaun RDTL

Hatutan.com, (01 Dezembru 2025), Díli–  Prezidente Parlamentu Nasionál (PPN), Maria Fernanda Lay, esklarese  objetivu husi Parlamentu Nasionál ne’ebé sei  realiza Semináriu Nasionál iha loron 03 fulan-Dezembru 2025 iha Salaun Ministériu Finansa  kona-bá atu halo revizaun bá Kontituisaun RDTL ne’e mak oportunidade bá PN atu halo diskusaun no rona ideia ka  feedback husi entidade hotu-hotu.

Prezidente Parlamentu Nasionál, Maria Fernanda Lay. Foto/Zita Menezes

PPN Maria Fernanda Lay afirma,  iha termu referénsia ne’ebé objetivu semináriu ne’e ninian para atu halo revizaun bá Konstituisaun, fó hanoin katak formatu interativu ida ne’ebé objetivu prinsipál kria amibénte ida ne’ebé di’ak para hodi halo promosaun reflexaun  kritika ligadu entre oposizaun entre bankada Governu no partidu sira ne’ebé hola parte iha ne’e.

“Para fó feedback ida parte husi interesadu hotu-hotu ho dezafiu implementsaun ita nian konstituisaun, tanba iha artigu balu hanesan iha lacuna, maibé ida-idak dada bá ninian ho razaun ida-ne’e mak oportunidade atu bele fó input hotu ho informasaun ne’ebé  validu no konsiderasaun katak parte hotu sai intervente hanesan autór bá asuntu ne’e rasik,” PPN Maria Fernanda Lay bá jornalista sira iha PN, Segunda (01/12/2025).

Nia afirma iha mós intervenente balu katak husu tenke halo revizaun bá konstituisaun RDTL, mais oinsá atu halo, ida-ne’e mak Parlamentu Nasionál ho inisiativa hodi elabora termu referénsia hodi halo rekolla informasoen hotu-hotu.

“Ita espera katak rezultadu husi semináriu nian fó impaktu para ita hodi haree konsilidasaun intituisaun nasionál iha kontrusaun identidade nasionál, ne’ebé la loos saida mak sai iha públiku dehan Prezidente Parlamentu iha inisiativa ida-ne’e, lae, inisiativa ida-ne’e bem insiu,” nia tenik.

Prezidente Parlamentu Nasionál ne’e espliká sé haree termu referénsia la’ós atu altera, lingua portugeza bá bahasa indonézia hanesan ema balu hateten iha mídia sosiál ne’e laloos.

“Foin mak  haree feedback, para altersaun bainhira haree bá konstituisaun, presiza maiória kualifikada CNRT mesak labele halo, FRETILIN mesak labele halo, tanba ne’e mak laiha razaun seluk, para ita bá ita hasai hotu tiha ita nian farda, tau ita nian hanoin ne’ebé di’ak liu, bá nasaun no bá povu,”hateten Maria Fernanda Lay

Nia hatutan tán katak “iha séminariu ne’e konvidadu sira hato’o sira nian ideia ne’e natural, tanba iha  ideia ne’e provoká diskusaun ho hanoin di’ak liu bá ita nia rai tanba konstituisaun lei mai, sé ita altera iha ne’e ita hakarak saida.  Ha’u hanoin laós Timor-Leste de’it iha nasaun barak ita kuidadu tebe-tebes  atu altera sira nian konstituisaun lei inan bá lei sira seluk,”.

Públiku ne’ebé sai alvu husi Parlamentu Nasionál ninian, iha eventu semináriu Nasionál ida-ne’e mak Prezidente Repúblika, Prezidente Parlamentu Nasionál, Primeiru-Ministru, Tribunál Rekursu, Eis Prezidente Repúblika no Eis Primeiru-Ministru, Sekretáriu Jerál  Partidu opozisaun, Vise-Primeiru Ministru no entidade lubuk ida inkluidu Prezidente Bankada no Distintu Deputadu sira no mós reprezentante ONU mós sei konvida.

Jornalista : Zita Menezes