Governu Kontinua Suspende Prátika Arte-Marsiál

Hatutan.com, (10 Dezembru 2025), Díli– Governu liuhusi reuniaun Konsellu Ministru,  iha loron 10 fulan-Dezembru 2025 aprová projetu rezolusaun Governu nian, kona-bá períodu vijénsia suspensaun ba ensinu, aprendizajen no prátika arte-marsiál no taka temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika arte -marsiál nian ne’ebé aumenta tan to’o loron 30 fulan-Juñu 2026.

Lee Mós: Governasaun Xanana Kontínua Suspende Atividade Arte-Marsiál To’o 31 Dezembru 2025

Organizasaun Arte-Marsiál (OAM) hamutuk 18 halo deklarasaun hodi harii dame no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár iha Jinaziu Desportu Díli, Kinta 13 fulan-Abríl 2023. Foto/Dok.

Tuir Komunikadu Imprensa ne’ebé Hatutan.com asesu husi portál Governu hateten desizaun ne’e fó kontinuasaun ba Rezolusaun Governu n. 45/2023, loron 10 fulan-Novembru, ne’ebé mak extende ona tuituir malu  hosi Rezolusaun Governu n. 17/2024, loron 24 fulan-Abríl, n. 60/2024, loron 7 fulan-Novembru, no n. 22/2025,  loron 7 fulan-Abríl.

Presupostu sira ne’ebé justifika suspensaun ne’e vigora nafatin, liuliu nesesidade atu hametin dame sosiál ne’ebé hetan ona dezde fulan-novembru 2023 no atu garante katak prátika arte marsiais sei bele halo de’it iha kontestu desportivu, hodi kontribui ba formasaun sívika no umanista ba joven sira.

Enkuantu IX  Governu Konstitusionál  foin lalais ne’e konklui prosedimentu lejizlativu hodi submete ba Parlamentu Nasionál proposta lei ida ne’ebé sei estabelese rejime jurídiku foun ba prátika arte-marsiál.

To’o nia aprovasaun no tama iha vigór, nafatin nesesáriu kontinuasaun ba suspensaun no enserramentu temporáriu ba fatin sira ne’ebé destinadu ba ensinu, aprendizajen no prátika artes-marsiál.

Jornalista: Zita Menezes