Prezidente Autóridade RAEOA Régio Salu Kontrata Asesór Estranjeiru ho Vistu Turista no Saláriu US$9000.00

Hatutan.com, (20 Dezembru 2025,) Díli—Prezidente Autóridade  Rejiaun Administrativa Espesiál Oé-Cusse Ambenu (RAEOA), Régio da Cruz  Salu, halo rektrutamentu no estabelese kontratu traballu ba  sidadaun estrajeiru, Farrukh Bashir Moriani ho nasionalidade Pakistaun ne’ebé utiliza vistu turista no saláriu kada fulan US$9000.00 nu’udár  Konselleiru Espesiál ba Ekonomia no Polítika.

Lee Mós: PA RAEOA Régio Salu Suspende Investimentu Ne’ebé Oé-Cusse Simu Ona Kontratu Arrendamentu Millaun $4

Prezidente Autoridade RAEOA, Régio da Cruz Salu. Foto/Dok

“Ha’u selu ema ne’e ho montante US$9,000.00 tanba ema ne’e iha espesialidade no nia saláriu boot liu iha UNDP US$10,000.00 (uluk) no nia mai Oé-Cusse atu ajuda ita.  Ita beik ten ko’alia arbitu, ita públika iha média sosiál,” Prezidente Autóridade  RAEOA, Régio da Crus Salu  esklarese  liuhusi nia diskursu iha atividade   Programa Movimentu no Emprendedorizmu  iha salaun Konvensaun 01 de Maiu, Palaban,  RAEOA, Sesta (19/12/2025) 

Régio da Crus Salu afirma nia kontrata peritu husi Pakistaun ne’e atu estabelese mós kooperasaun ho parseiru sira iha nivel ASEAN, maibé kontratu servisu ba asesór ne’e sai viral fali.

“Aban, ha’u sei lori sé mak espalla ne’e ba Ministériu Públiku. Espalla ema internasionál ida, ha’u nia staff id aba iha média halo ministru sira hotu preokupa ida-ne’e,” Régio da Crus Salu hateten.

Tuir dokumentu ne’ebé Hatutan.com asesu hatudu katak asesór ho nasionalidade Pakisaun ne’e iha  karimbu entrada iha viza Timor-Leste  ne’e  foin tama mai Timor-Leste iha  loron 16 fulan-Dezembru 2025 ho vistu turista, maibé ninia kontratu ne’e hahú iha loron 07 Novembru 2025 no sei termina iha loron 31 fulan-Dezembru 2025.

PA-RAEOA Régio da Crus Salu  kontrata Farrukh Bashir Moriani ho nasionalidade Pakistaun ne’e hanesan Konselleiru Espesiál ba Ekonomia no Polítika ba Prezidente RAEOA no ZEEDOA tuir Kontratu Servisu Termu Sertu ne’ebé asina iha loron 14 fulan-Novembru 2025.

Kontratu ne’e hahú iha loron 07 fulan-Novembru 2025 no sei remata iha loron 31 fulan-Dezembru 2025, ho durasaun fulan ida no loron 24. Kontratadu sei servisu iha Eskritóriu Sentral RAEOA iha Pante Makasar, ka iha eskritóriu RAEOA iha Díli, no bele mós hetan destakamentu iha fatin seluk iha  territóriu nasional.

Hatutan.com husu ona tempu ba  Prezidente  Autoridade  Rejiaun Administrativu Espesiál Oé-Cusse Ambeno  (RAEOA,) Régio da Cruz Salu,  hodi bele halo konfirmasaun kle’an liután ba kestaun kontratu ho sidadaun Pakistaun ne’e, maibé  nia  informa de’it katak laiha tempu atu  ko’alia asuntu ne’e tanba ema ne’ebé la kumpriende maka pasa informasaun  bá  média.

“Bele lori bá Tribunal sé  ha’u sala,  favór halo ita-boot  nia servisu,  ha’u mós halo  ha’u nia servisu, sé ne’e kontra lei entaun aprezenta bá Tribunál,”  Regio Salu hateten liuhosi menesajen WhatsApp.

Prezidente Autóridade  Rejiaun Administrativu Espsiál Oé-Cusse  Ambeno (RAEOA) Régio da Crus Salu  nia diskursu atividade   Programa Movimentu no Emprendedorizmu  iha salaun Konvensaun 01 de Maiu, Palaban,  RAEOA, Sesta (19/12/2025), afirma katak    nia rekruta asesór internasionál hodi tulun servisu bá estebelsimentu  ho parseira sira iha nivél ASEAN.

“Maibé sai virál fali no   Aban,  20 fulan-Dezembru 2025, ha’u sei lori sé maka espalla ne’e bá Ministériu Públiku,  espalla ema internasionál ida, ha’u  nia staff ida halo ema ne’e sai, ministru sira hotu mós  preokupadu ho ida-ne’e,” Régio da Crus Salu afirma tán.

Nia hateten,  katak nia bolu ekipa lubuk ida, la’ós asesór babain atu mai buka osan, tanba kada tinan orsamentu US$500,000.00 husi RAEOA, no $500,000.00 husi rai-liur ne’ebé atu introduz iha tinan oin 2026.

“Fundu US$500,000.00  mai husi nia ha’u nia asesór sira-nia servisu ho  ekipa ne’e,  ita bolu ema mai apoia ita bá ajuda povu, maibé Oé-Cusse ona la komprede no la servisu  tuur de’it ko’alia barak, ami mai iha ne’e atu prepara tinan  2026 planu ne’e la’o ona,. Tinan oin Governu ho Parlamantu Nasionál  mai halo fiskalizasaun bá buat ne’e, agora ha’u bolu ekipa atu ajuda ita, mas mosu viral iha Facebook,” nia hateten no la menta tebetebes.

Nia  klarifika, katak  razaun  selu  asesór vistu turista ho osan montante US$9000.00 kada fulan, tanba ema ne’e saláriu boot liu tanba UNP selu nia US$10,000.00.

“Ita beik ten la hatene ita ko’alia arbiru, ita bá publika ema iha média, haree ita-nia inkonsistensia, hatudu  ita nia aan  la’ós matenek, ne’e ha’u nia asesór balu mak lori públika iha li’ur, no ha’u kodena nia,”  PA-RAEOA  Régio da Crus Salu  hateten ho hirus oituan.

Jornalista: Marcelino Tomae