Governu Husu Dadur Sira Halo Reflesaun Kle’an iha Natal-Tinan Foun

Hatutan.com, (23 Dezembru 2025), Díli– Vise-Primeiru no Ministru Asuntu Ekonomia,  Turizmu no Ambiénte, Francisco Kalbuadi Lay, hamutuk ho ministériu relevante ho Gabinete Prezidénsia Repúblika, Tersa (23/12/2025), selebra Natal hamutkuu ho dadur sira iha prizaun Becora hodi husu atu dadur sira halo reflesaun kle’an iha Natan no tinan foun ne’e.

Lee Mós: Natal, Tempu Fahe Ksolok no Hakle’an Fraternidade Umana iha Sosiedade

Vise-Primeiru Ministru no Ministru Asuntu Ekonomia, Turizmu no Ambiénte, Francisco Kalbuadi Lay, hato’o korajen ba dadur sira iha Preizaun Becora hodi selebra natal no tinan foun ho dadur sira, Tersa (23/12/2025). Foto/Zita Menezes

Vise Primeiru-Ministru Francisco Kalbuadi Lay, hateten, kontenti tinan ida  bele mai hamutuk ho dadur sira lori netik Prezidente Repúblika José Ramos-Horta no Primeiru-Ministru Kay Rala Xanana Gusmão nian naran  hodi hato’o ksolok natal no tinan foun ho maluk dadur sira.

“Ha’u hanoin ita hotu-hotu moris iha mundu, katak Maromak ba ema hotu, laiha ema ida mak perfeitu iha mundu inklui ha’u. Ami hotu no mós avo na’in rua (Xanana & Horta) hakarak loron ruma katak imi sira ne’ebé mak iha ne’e liuliu joven sira, apa katuas imi ba fali iha vida normal, kontenti sé loron ruma imi hamutuk fali ho ami iha ne’e mai hatudu katak fatin ida-ne’e ita sala na’in, maibé ita mós iha esperansa no iha futuru ne’ebé hein hela ita ba aban bainrua,” Francisco Kalbuadi Lay hateten.

Lori  Prezidente Repúblika José Ramos-Horta ho Primeiru-Ministru Kay Rala Xanana Gusmão nian naran no membru Governu  hotu-hotu hato’o feliz natal ba ba dadur sira hotu, no prospiere tinan foun 2026.

Iha sorin seluk Ministru Justisa Sergio Hornai de Jesus hateten iha loron sira importante hanesan natál loron nasionál sira no loron importante seluk priosioneiru sira sei la mesak, mézmu ita-boot sira kulpadu tanba ita-boot sira nian komportamentu no ita-boot sira nian hahalok, emosaun ne’ebé ita-boot sira konsentra rasik ou la konsiénte tanba emosaun ne’ebé mak mosu ita-boot sira mai hela iha fatin ida-ne’e ita-boot sira la sente izoladu.

“Ita-boot sira mai halo formasaun no ita-boot sira mai halo reflesaun ida  kle’an tán para atu haree ita-boot sira nian komportamentu ida-idak hodi reflesaun ida iha vida esperitualidade ninian,” hateten Ministru Justisa Sergio Hornai

Vise PM Francisco Kalbuadi Lay hakoak dadur ida hodi hato’o korazen iha ámbitu Natal hamutuk ho dadur sira iha Prizaun Becora. Foto/Zita Menezes

Nia afirma Governu buka esforsu nafatin ho ita-boot sira ninian advogadu hamutuk ho ita-boot sira nian familia komisaun religioza sira ne’ebé fó asisténsia ba ita-boot sira para ita-boot sira bele hetan kompartamentu ida di’ak para nune’e atu hetan komutasaun peña ka hetan redusaun peña iha ita-boot sira nian indultu karik ita-boot sira hatudu komprtamentu di’ak.

Iha fatin hanesan Diretór Jerál Estabelismentu Prizionál Becora, Agapito Canto hateten kada tinan sempre halo selebrasaun loron natal no tinan foun hamutuk ho daduir sira la’ós iha prizaun Becora de’it maibé selebra mós loron natal ho prizaun Suai no  Gleno. Nune’e agradadese ba Governu tanba membru Governu sira mai partisipa hotu iha selebrasaun loron ho prisioneiru sira.

Diretór Jerál ne’e afirma daudaun  ne’e prisioneiru iha prizaun bekora ne’e hamutuk  400 itál no difikuldade ne’ebé durante sira hasoru mak kona-bá menus transporte ne’ebé tula prisioneiru sira atu ba iha instituisaun justisa sira.

Jornalista: Zita Menezes