Suspeitu Kazu Violasaun no Koasaun Seksuál iha Hera Aumenta Ba Na’in-Haat

Hatutan.com, (10 Fevereiru 2026), Díli-Polisia Nasionál Timor-Leste (PNTL) Munisípiu Díli kontinua hakle’an investigasaun ba kazu violasaun no koasaun seksuál ne’ebé akontese iha Hera iha loron 28 fulan-Dezembru tinan 2025.

Lee Mós: PNTL Kaptura Suspeitu JG ho UF Ba Kazu Violasaun no Koasaun Seksuál

Polísia kaptura tan suspeitu ba kazu violasaun no koasaun seksuál ne’ebé akontese iha Hera iha loron 28 Dezembru 2025. Foto/Juvinal Cabral dos Santos

Iha loron hirak liubá, autoridade Polísia kaptura suspeitu na’in-rua ho inisiál JG ho UF no Segunda  (09/02/2026), kaptura tan na’in-rua ho inisiál IX ho MN ne’ebé deskonfia envolve iha kazu violasaun no koasaun seksuál ne’e,

Ba kazu ne’e rasik  Tribunál Judisiál Primeira Instánsia Díli (TJPID) hasai mandate detensaun ho   Nuc: 0487/25.DIBCR buka tuir no kaptura suspeitu sira hodi aprezenta ba Tribunál atu bele responsabiliza ba sira-nia aktu tuir lei mak vigora.

“Relasiona kazu violasaun no kazu koasaun seksuál ho raptu akontese iha  loron 28 fulan-Dezembru tinan 2025, iha Postu Administrativu Kristu-Rei, área Hali Dolar, Hera,  iha semana ida liubá,  kaptura ona arguidu na’in-rua ho inisiál JG ho UF no aprezenta ona ba iha Tribunál  oras ne’e daudaun sira ba ona iha pena prizaun preventive. Iha Segunda-ne’e, kaptura tan suspeitu na’in-rua ho inisiál IX ho MN hodi detein iha sela detensaun Polísia hodi aprezenta ba Tribunal iha oras 72 nia laran,” Komandante PNTL Munisípiu Díli, Superientendente Xefe Polisia Orlando Gomes informa  ba jornalista sira iha Eskuadra Polísia Dom Aleixo, Tersa (10/02/2026).

Arguidu inisial IX kaptura iha Caicoli no MN  kaptura iha área Santa Cruz nian, maibé suspeitu ida MN ne’e mak kolabora ho di’ak nia mai aprezenta an iha Komandu.

Jornalista: Juvinal Cabral dos Santos