Konten Kreatór Ary Bargon Dúvida ho SEKOMS-MTK Lori Google AdSense ho YouTube Mai Timor-Leste

Hatutan.com, (19 Fevereiru 2026), Díli– Konten kreatór no komedian Timoroan, Rivelino Barros Goncalves “Ary Bargon”, dúvida boot ho esforsu Sekretáriu Estadu Komunikasaun Sosiál (SEKOMS), Expedito Dias Ximenes ho Ministériu Transporte no Komunikasaun (MTK) atu lori Google AdSense ho TouTube mai loke reprezentasaun iha Timor-Leste.

Lee Mós: CI Konsidera SEKOMS Halo Plájiu Grave no Sei Haruka Karta Lamentasaun

Jornalista Hatutan.com, halo entrevista ho konten kreatór nu’udár mós komedian Timoroan, Ary Bargon, foin lalais ne’e, iha Motael, Díli.

Iha loron, 13 fulan-Marsu 2025, reprezentante konten kreatór sira hasoru malu ho SEKOMS Expedito Dias Ximenes iha Palásiu Gvoernu,  hodi propioin ba  Governu Timor-Leste konvida plataforma boot sira hanesan Meta Facebook, YouTube, no TikTok, Google AdSense atu loke reprezantasaun iha Timor-Leste. 

Ho baze ba ideia konten kreatór Timoroan sira-nian ne’e,  SEKOMS Expedito Dias Ximenes ho nia ekipa téniku halo vijita ida ba Jakarta  halo enkontru oioin ho konten kreatór Timoroan sira, inklui halo vizita traballu to’o Jakarta-Indonézia hodi hasoru malu ho parte kompetente sira, hanesan Meta Facebook, Gogole AdSense no YouTube no kontinua promote ba konten kreatór Timoaon sira atu lori duni Google ho YouTube mai Timor-Leste.   

Konten Kreator Timoroan Rivelino Barros Gonçalves “Ary Bargon”  iha dada-lia ho Hatutan.com  iha  Jardin Motael,  Segunda kalan (16/02/2026), hato’o nia dúvida ba esforsu no advokasia husi SEKOMS ne’ebé lori Governu Timor-Leste nia naran la ho serteza  atu konvense Google AdSense ho YouTube mai loke nia reprezentasaun iha Timor-Leste.

 “Iha ami nia enkontru sira  ho  SEKOMS Expedito Ximenes promete katak durante nia mandate sei esforsu   lori Google AdSense ho YouTube mai Timor-Leste, ho razaun ida katak  bele reduz dezempregu,  tanba ema bele hetan osan, uituan ka barak husi ne’ebá, maibé bá ha’u imposivel SEKOMS atu lori Google AdSense ho YouTube mai Timor-Leste,” Ary Bargon  hateten.

Nia hateten realidade  hatudu  situasaun  iha Timor-Leste ohin loron akontese iha internet sei fraku, tanba promete fibra ótika atu garantia kualidade internet, maibé  to’o ohin loron ema barak  sei halerik bá kualidade internet no presu ne’ebé karun liu iha mundu.

Ary Bargon informa, iha enontru konten kreatór Timoroan sira ho SEKOMS Expedito Dias  Ximenes,  hato’o informasaun oioin, katak sira-nia parte hasoru ona Google Adsense iha Indonézia no Singapura,  maibé kontinuasaun ne’e oinsá laiha  informasaun serteza.

“Ita hein to’ok, maibé atu dehan katak  IX Govenrnu Konstitusionál nia mandatu atu hotu ona, tanba ne’e ha’u sente difisil no imposivel SEKOMS atu lori Google AdSense ho YouTube mai Timor-Leste, tanba  ita haree katak investór barak mai  investe iha Timor-Leste maibé lei   atu asegura sira laiha,  hanensan mós Google AdSense. Ha’u nia dúvida ida tan maka, kada uma-kain sira iha territóriu nasional nia kode  lokasi,  satán Díli ne’e sei muda tun muda sa’e, entaun íha Dili de’it ha’u sei dehan  imposivel, piór liután munisípiu, tanba Google AdSense nia rekizitu maka ida-ne’e, tanba ne’e ha’u  dehan imposivel, maibé la hatene  SEKOMS ho MTK uza estratéjia seluk hodi konvense  Google karik ita la hatente,” Ary Bargon hateten.

Komedian Timoroan  ne’e  hatutan, planu  atu lori Google AdSense ho YouTube  mai Timor-Leste hahú kedas iha VIII Governu konstitusionál, uanhira mosu hanoin balu husi  komunidade YouTuber Timoroan sira forma  grupu ida   Comunity ida-ne’e hodi bele fanu no   fó hanoin bá Governu  oinsá atu bele Google AdSense ne’e mai Timor-Leste.

Nia haktuir, iha VIII Govenrnu konstitusionál kedas grupu ne’e organiza malu hasoru Sekretáriu Estadu Komunikasaun Sosiál  (SEKOMS), Mauricio Juvinal Akara, atu buka dalan atu lori Google AdSense ho YouTube mai Timor-Leste, maibé realidade la konsege  realiza mehi ne’e.

Mai fali iha IX Governu Konstitusionál  Comunity  Youtuber Timor-Leste  ho Grupu konten kreator sira balu tan  nafatin no halo enkontru ho SEKOMS oinsá atu buka dalan bá Google AdSense ne’e mai duni Timor, nafatin seidauk akontese to’o ohin loron.

“Tanba ita hotu hatene katak ema ne’ebé hanesan konten kreator  nia bele hetan osan uanhira  ninia media sosiál chanel YouTube ne’e  rejistadu iha Google AdSense hodi sai legál, maibé ikus mai komu  iha difikuldade boot tanba Google AdSense ne’e mós  kompaña internasionál ida, entaun Comunity YouTuber Timoroan sira ho grupu konten kreator Facebook pro,  halo enkontru SEKOMS Expedito Dias Ximenes hodi buka  dalan bá ida-ne’e. Momentu ne’ebá ha’u mós marka prezensa iha enkontru ida-ne’e, ha’u sente orgullu  tanba espiritu husi Membru Govenrnu liu-husi SEKOMS Expedito Ximenes iha vontade duni atu buka duni dalan  hodi Governu Timor bele kopera ho YouTube no Google AdSense,” nia dehan

Ary Bargon afirma, enkontru dala tolu, no informasaun faze pur faze  husi SEKOMS Expedito Ximenes katak Google AdSense hakarak servisu ho Timor,  maibé iha kriteria barak maka presiza Timor-Leste kumpre. 

Nia dehan, informasaun ne’ebé sira rona katak SEKOMS Expedito Ximenes ho Ministru Trsnsporte Telekomunikasaun  Miguel Marques Manetelu,  halo hela esforsu, maibé agora dadaun esforsu sira ne’e malirin de’it ona no laiha tan informasaun serteza.

“Agora ne’e ita la rona ona informasaun foun ruma husi SEKOMS, tanba ema pesoál ida labele ko’alia hasoru kompaña internasionál ida hanesan Google AdSense sira ne’e, só  Govenrnu ho Govenrnu bele buka solusaun hamutuk, maibé realidade seidauk iha solusaun,” Ary Bargon hateten.

Ary Bargon esplika, Timor-Leste sei falta rekejitu balun hanesan internet sei fraku, no konten kreator ho YouTuber sira sei menus,  no  kode post  inklui lokasi bá ema ida-idak nia uma  seidauk iha, ida-ne’e maka sai difikuldade bá prosesu atu lori Google AdSense mai Timor-Leste.

Kona-bá  mós ba konten kreatór Timroan, Ary Bargon hatutan, antes ne’e SEKOMS Expedito Ximenes tenta atu  halo programa  ida ba Munisípiu no bá eskola sira fó formasaun, no fó informasaun bá komunidade  sira kona-bá  oinsá atu uza  sosiál mídia  halo konteudu oioin, atu nune’e, prienese rekizitu hodi hatudu bá Google AdSense katak Timor-Leste  iha ema konten kreator ne’e barak. Maibé, ida-ne’e Ary Bargon rekoñese  seidauk haree SEKOMS Expedito Ximenes atu implementa nia programa ne’e.

Nia subliña,  molok ne’e mós  grupu konten kreator sira husi Facebook pro ho Tiktok, SEKOMS Expedito Ximenes promete  atu  servisu  hamutuk ho Facebook, Tiktok, maibé kueze fokus de’it bá YouTube  mais realidade  esforsu bá Google AdSense ho YouTube seidauk klaru, satán Facebook pro ho Tiktok.

Nia afirma, Governu  liu-liu SEKOMS Expedito Ximenes sente katak ida-ne’e la importante,  tanba ne’e nia rekomenda katak ema ne’ebé kaer pasta Sekretáriu Estadu Komunikasaun Sosiál ne’e tenke iha kreativu no komprende kle’an  kona-bá  mundu dijizalisaun.

“Ema ne’ebé servisu bá asuntu ida-ne’e, presiza duni tekniku para nia kumpriénde liu-liu ema ne’ebé maka idade joven,  atu nune’e, update servisu tuir mundu modernu ohin  loron ne’e,  sé fó bá ema ne’ebé la laiha kapasidade signifika abandona tiha asuntu kona-bá Google AdSense ho média sosiál sira seluk  ne’ebé bele hetan osan iha Timor-Leste,”  Ary Bargon dehan.

Nia afirma tan se Govenrnu konsidera  kestaun Google AdSense ne’e pertinente duni,  maka SEKOMS ho MTK tenke servisu  seriu duni  atu bele aselera s hodi fó benefisiu mós Timor-Leste.

Jornalista Hatutan.com halo konfirmasaun ho SEKOMS Expedito Dias Ximenes, Kuarta (21/01/2026). Foto/Dok.

Iha sorin seluk, Hatutan.com mós komfirma ho  Sekretáriu Estadu Komunikasaun Sosiál Expedito Dias Ximenes, hateten,  Google AdSense ne’e Govenrnu  liu-husi SEKOMS ho  Ministériu Trsnsporte no Komunikasaun (MTK), tanba  operadador telekomunikasaun ne’e tutela iha MTK.

Nia hatutan, SEKOMS haree bá de’it konteudu konten kreator,  tanba ne’e maka SEKOMS ho MTK servisu hamutuk bá prosesu Google AdSense ho YouTube mai Timor-Leste.

“Ami íha komunikasaun barak,  ami bá Singapura, ami bá iha Google, ami bá iha YouTube, Meta Facebook iha Jakarta, sira husu  buat rua de’it, ida maka velosidade internet tenke  maka’as ne’e hanensan kriteria ida,  ne’ebé  fibre ótika besik atu funsiona ona, ida-ne’e hanesan rekizitu ida,” Expedito Ximenes hateten bá jornalista sira hafoin serimonia tomada pose Prezidente Konsellu Administrasaun RTTL.E.P foun, Rosario Gracia Martins iha edifisiu RTTL,E.P, Kinta (19/02/2026).

Expedito Dias Ximenes subliña, rekizitu seluk maka,  presiza literasia dijitál bá iha joven sira atu bele kompriende  uza mídia sosiál no utiliza internet ho didi’ak.

“Prosesu Google AdSense ho YouTube mai Timor-Leste la’o hela. Ha’u ho Ministru MTK Miguel Manetelu bainhira vizita ruma bá li’ur karik ami sempre bá buka  oinsá halo komunikasaun ho ho YouTube, Google, Meta  iha Jakarta no mós  iha Singapura,” Expedito hateten.

Nia dehan, tanba ne’e agora dadaun, Govenrnu instala hela fibra ótika, institusaun estadu sira uza ona depois sei bá iha komunidade sira,  no halo literasia dijitál bá joven sira.

Expedito Dias Ximenes rekoñese no  la garantia katak  iha nia mandatu hanesan SEKOMS bele  lori Google AdSense ho YouTube mai Timor-Leste.

“Ha’u la bele dehan atu garantia, maibé esforsu sei to’o iha  ne’ebá,” Expedito Ximenes hateten.  

Jornalista: Marcelino Tomae