Iha Hela Investigasaun, Membru PNTL Ida Involve Kazu Abandona Bebe iha HNGV

Hatutan.com, (13 Marsu 2026), Díli-Komandante Polísia Nasionál Timor-Leste (PNTL) Munisípiu Díli, Superintendente Xefe Polísia Orlando Gomes, informa, kazu abandona  bebe iha Ospitál Nasionál Guido Valadares (HNGV) deskonfia envolve mós membru PNTL ida.

Lee Mós: PNTL Asegura Ona JRO Ne’ebé Abandona Bebe iha HNGV

Komandante PNTL Munisípiu Díli, Superintendente Xefe Polísia, Orlando Gomes. Foto/Juvinal Cabral dos Santos

“Kona-bá kazu ida-ne’e deskonfia katak iha membru PNTL mós envolve, maibé ida-ne’e ita seidauk hatene loloos ne’ebé iha prosesu investigasaun mak foin hatene loos ka laloos,” Superintendente Xefe Polísia Orlando Gomes,  ba jornalista sira iha Eskuadra Polísia Dom Aleixo, Díli, Sesta (13/03/2026).

Komandu PNTL liu husi seksaun Vulnerable Person Unit (VPU) simu ona relatóriu husi inan ba bebe hanesan mós suspeita JRO, depois informasaun ne’e foti tiha nia deklarasaun hafoin haree nia prosesu investigasaun tuir mai.

Bainhira iha investigasaun mak  membru PNTL ida ne’ebé suspeitu ba kazu ne’e tenke foti nia deklarasaun depois prosesu mak haree.

Komandu PNTL Munisípiu Díli liu husi Eskuadra  Polísia Vera Kruz simu informasaun dotór iha HNGV  kona-bá bebe ne’ebé mak partu iha maternidade, autoridade seguransa hetan informasaun iha loron  09 fulan-Marsu tinan 2026, hale’u tuku 11:40 Otl ekipa patrolla to’o kedas iha HNGV hodi konfirma no observa ba situasaun ida-ne’e.

Hafoin iha observasaun loos duni katak bebe ida  partu iha HNGV ho defisiensia, depois partu iha maternidade transfere kedas ba iha Unidade Kuidadu Intensivu (ICU) pediatriku ka labarik nian tanba moris mai ho defisiensia.

Iha momentu ne’ebá suspeita JRO hanesan inan, abandona hela bebe ne’e durante semana rua iha HNGV no pessoál  saúde sira mak tau matan no madre sira balun hetan vizita.

Tuir observasun Hatutan.com iha Kinta, 12 fulan-Marsu ne’e, haleu tuku 11:30 Otl, família husi bebe nian, feto nain rua mós prezensa ona  iha diresaun justisa disiplina Komandu jerál PNTL Caicoli.

Jornalista: Juvinal Cabral dos Santos