Prezidente Repúblika Fasilita Embaixadór Na’in-17 Vizita Ataúro

Hatutan.com, (17 Marsu 2026), Ataúro-Prezidente Repúblika, José Ramos-Horta hamutuk ajensia turizmu sira iha Timor-Leste, inklui Autoridade Portuáriu Timor-Leste (APORTIL) fasilita diplomata estranjeiru na’in-17 vizita illa Ataúro.

Prezidente Repúblika fasilita embaixadór sira husi nasaun 17 vizita illa Ataúro, Tersa (17/03/2026). Foto/Juvinal Cabral dos Santos

Jornalista Hatutan.com, Juvinal Cabral dos Santos,  ne’ebé hetan oportunidade husi Palásiu Prezidensiál hodi akompaña viajen diplomata no turistiku ba illa Ataúro ne’e, observa katak diplomata na’in-17 ne’ebé akompaña husi Xefe Kaza Sivíl Prezidénsia Repúblika, Henriqueta Maria da Silva, ho ró  sai husi Portu Díli haleu tuku 08:20 Otl to’o iha Portu Beloi- Ataúro, tuku 10:40 Otl.

Prezensa bainaka korpu diplomátiku hirak ne’e nian iha Ataúro simu  lia na’in sira tuir ritu no tradisaun Ataúro oan sira nian, no ho lia dadoli ne’ebé akompaña husi  Prezidente Autoridade Administrativa Ataúro no komunidade sira.

Durante iha  vizita ne’e diplomata sira vizita kedas baraka ne’ebé  komunidade sira prepara iha tasi-ibun parte Beloi  nian, hanesan grupu kreatividade, te’in hahán tradisionál, fa’an ai-han lokál sira no fa’an ikan maran.

Xefe Kaza Sivíl Prezidénsia Repúblika, Henriqueta Maria da Silva hateten, Prezidente Repúblika servisu hamutuk ho governu, servisu hamutuk mós ho ajensia Turizmu sira iha Timor-Leste, ho parte hotu-hotu inklui Aportil kolabora loos oferese Ró Berlin Nakroma hodi fasilita diplomata sira haree Ataúro nia potensialidade turizmu.

“Ita lori sira hanesan turista, lori sira hanesan diplomata, sira bele fó mós osan ruma ba ita nia komunidade hahú kedas iha ró laran rendimentu ruma. Entaun ita fila fali mak oferese otel maibé bainhira sira mai, sira livre iha Ataúro, sosa saida de’it iha Atauro, fó mós rendimentu ba komunidade Ataúro,” Henriqueta Maria da Silva hateten ba jornalista sira.

Vizita ida ne’e mai hanesan sira Embaixadór entaun sira automatikamente sira mai vizita sira sei sai mós ema ne’ebé sei promove Timor, liu-liu illa Ataúro ida ne’e ba iha fatin hotu-hotu ba iha sira nia rain.

Nia afirma, objetivu Prezidensia Repúblika lori Embaxadór sira mai iha Ataúro atu promove illa Ataúro ba ema internasionál sira liu-liu Embaxadór sira, tanba sira sai hanesan Embaxadór kada nasaun ida.

Ataúro oan sira aprezenta produtu artezenatu iha ámbitu vizita embaixadór na’in-17 ba Illa Ataúro. Foto/Juvinal Cabral dos Santos

Embaxadór barak ne’ebé mai barak liu Embaixadór naun rezidente, entaun sira mai sira sei sai mós ema ne’ebé sei halo promosaun ba illa di’ak hanesan ho Ataúro ne’ebé ho nia natureza ne’ebé di’ak, paisajen ida ne’ebé furak.

Durante loron ida iha Ataúro, oras 04:00 Otl lokraik delegasaun embaixadór sira fila fali ba Dili.

Iha fatin hanesan, Prezidente Autoridade Administrativa Ataúro, Mateus Belo hateten, primeiru preveleiju boot ho vizita Embaixadór sira nia vizita ida ne’e signifikante tebe-tebes ba Atauro sai hanesan fatin distinatóriu turistiku la’ós de’it Embaxadór sira ne’e mai, kuaze fim semana, vizita bainaka estranjeiru sira, turista sira barak tebe-tebes.

“Vizita ida ne’e liu-liu ba ita nia membru korpu diplomátiku mai husi rai-li’ur, ha’u hanoin ida-ne’e importante loos, nune’e bele promove atividade turizmu iha Ataúro ba mundu seluk ka nasaun seluk,” Mateus Belo hateten.

Autoridade afirma, hanesan informasaun ne’ebé sira simu, primeiru ba luku tasi tanba Atauro koñesidu iha rekursu tasi ne’ebé riku tebe-tebes iha mundu.

Prezidente Autoridade Ataúro dehan, ho lia grupu komunidade sira, ne’ebé hala’o atividade hanesan boneka, artezenatu sira, homan sira bele promove hanesan identidade Ataúro nian.

Embaixadór Laos mai Timor-Leste, Khamfeuang Phanthaxay hateten, nia sente kontenti tebes vizita illa Ataúro dala-uluk haree paisajen tasi ibun furak tebes.

“Ha’u nu’udar embaixadór Laos nian iha Timor-Leste. Impresionante tebes katak ha’u vizita illa furak ida-ne’e liuliu ospitalidade hosi ema sira iha ne’e no mós ambiente tasi-ibun ne’ebé furak tasi-ibun iha illa ne’e,” Embaixadór Laos mai Timor-Leste, Khamfeuang Phanthaxay haktuir.

Diplomata estranjeiru sira vizita Illa Ataúro. Foto/Juvinal Cabral dos Santos

Nia informa, vizita ida-ne’e mak nia vizita dala uluk, maibé hein katak ida-ne’e la’ós ikus ba nia.

“Ha’u gosta komunidade lokál nia ospitalidade no mós, ha’u gosta hahán tradisionál. Ha’u koko ona hahán lokál iha ne’e, di’ak no ha’u koko ne’e midar tebes. Bainhira ha’u fila, ha’u sei relata fali ba hau nia Ministériu Negósiu Estranjeiru Laos nian katak ha’u vizita illa furak ida-ne’e. No bainhira ha’u hasoru malu ho ema sira husi Laos ka husi governu ka husi embaixadór husi nasaun seluk iha Jakarta, ha’u mós hakarak ko’alia kona-ba ida-ne’e no habelar informasaun ida-ne’e ba sira mós”, Embaixadór Laos ba Timor-Leste, Khamfeuang Phanthaxay hateten.

Nia dehan, Setor ida ne’ebé nia hanoin atrativu liu mak turizmu. Setor ida ne’e mak buat ida ne’ebé signifikativu ne’ebé ita bele dezenvolve no promove ba mundu kona-ba ambiente ne’ebé furak, maibé buat ida ne’ebé importante maka nia hanoin koko atu mantein tradisaun komunidade lokál Ataúro nian.

“Ha’u hakarak hateten katak envolve ema lokál sira ho atividade ruma ne’ebé maka kona-ba turizmu. Ha’u hanoin ida-ne’e sei sai dalan di’ak liu atu promove ba mundu,” nia rekomenda. ***