Governu Sei Haruka Dokumentu Legál ba PGR Hodi Hahú Halo Investigasaun Ba Ró Haksolok-Aviaun Twin Otter

Hatutan.com, (19 Marsu  2026), Díli- Primeiru-Ministru Kay Rala Xanana Gusmão, Kinta (19/03/2026), informa  kompañia  Auditóriu Internasionál Ernst & Young, haruka relatóriu no dokumentu legál mai Governu Timor-Leste kona-bá akizasaun aviaun Twin Otter ho Ró Haksolok, maka Governu sei haruka ba Prokuradoria Jerál Repúblika (PGR, sigla portugés) hodi hahú halo investigasaun.

Lee Mós: Kazu Ró Haksolok, Ministériu Públiku Rekolla Tan Faktu Foun

Primeiru-Ministru Kay Rala Xanana Gusmão. Foto/Zita Menezes

Primeiru-Ministru Kay Rala Xanana Gusmão  iha enkontru semanál ho Prezidente Repúblika, José Ramos-Horta iha Palásiu Prezidensiál,  informa mós  Xefe Estadu  katak Konsellu Ministru iha Kuarta-feira, fó apresiaun boot tebes ba relatóriu Ernst Young  ne’ebé halo hotu ona auditória ba prosesu sira akizasaun Ró Haksolok ho aviaun Twin Otter.

“Auditóriu forense katak  irregularidade sira hotu bele aprezenta dadus konkretu kona-bá saida  de’it mak akontese,  iha aspetu teknikú, aspetu politikú, aspetu instituisionál liuliu aspetu ida korrupsaun,” Xanana Gusmão ba jornalista sira.

Xefe Governu esplika depois rona hotu  relatóriu Ernst & Young  Governu fó apresiaun boot tebes ba Ernst  & Young, sé lae  Governu   mak  halo dehan politizadu, tanba ne’e auditóriu  só mai husi estranjeiru hodi hatudu mós katak problema jestaun no problema instituisaun tenke iha relatóriu.

“Depois kuandu kompañia  Auditóriu Internasionál Ernst  & Young  haruka ona mai Governu relatóriu ne’ebé boot, ho dokumentu prová kona-bá aviaun Twin Otter no Ró Haksolok maka Governu sei haruka ba Prokuradoria Jeral Repúblika atu hahú ona investigasaun ba prosesu legál,” Xanana informa.

Jornalista: Zita Menezes