Xanana Lori Governu no Povu Nia Naran Hato’o Ksolok Idul Fitri Ba Musulmanu Tomak

Hatutan.com, (20 Marsu 2026), Díli– Primeiru-Ministru (PM), Kay Rala Xanana Gusmão, lori IX Governu Konstitusionál nia naran no lori povu Timor-Leste nia naran hato’o ksolok Indul Fitri 1447 Hijriah ba musulmanu sira hotu.  

Lee Mós: Musulmanu Timor-Leste Selebra Idul Fitri 1447H

PM Xanana hamutuk ho muslumanu sira selebra Idul Fitri 1447 Hijriah iha Embaixada Repúblika Indonézia nian iha Díli, Sesta (20/03/2026). Foto/Zita Menezes

“Ohin loron Idul Fitri, hodi IX Governu nia naran no povu tomak nia naran harohan ba Maromak tulun nafatin maluk sira ne’ebé ohin selebra loron Idul Fitri. Ita hotu husu ba leten aas ba, hodi tulun nafatin ita haku’ak malu ho domin hodi nune’e dame bele hamriik iha Timor nu’udár kondisaun boot t

ebes atu ita bele dezemvolve ita nian  rai ne’e,” PM Xanana Gusmão  hateten bainhira paritispa selebrasuna loron Idul Fitri hamutuk ho komunidade musulmanu iha Embaixada Repúblika Indonézia iha Díli, Sesta (20/03/2026).

Iha selebrasaun loron  Idul Fitri 1447 Hijriah ne’e,  Primeiru-Ministru Kay Rala Xanana Gusmão, lori Governu nia naran partisipa selebrasaun Idul Fitri hamutuk ho  musulmanu iha Timor-Leste   iha Embaixada Indonézia, tanba hetan konvité husi embaixadór Indonézia iha Timor-Leste Okto Dorinus Manik tanba nia mandatu mós besik termina ona.

Xefe Governu ne’e afirma iha biban ida-ne’e sira mós ko’alia kona-bá situasaun  mundu nian ne’ebé hasoru hela funu boot tebes entre  Estadus Unidus Amérika-Israel hasoru Iraun, tanba ne’e sei iha problema mina, problema hahan, tanba ne’e ohin hamutuk ho  embaixadór sira ho Pertamina Internasional Timor (PITSA)  haree no diskuti daudaun ona oinsá mak impaktu husi funu labele mai estraga fali povu nian moris.

“Ba maluk sira tomak musulmanu iha Timor,  ha’u nia hakuak boot ho respeitu boot, ita hotu hamutuk hanoin ida de’it kria domin no dame hodi ita bele harii rai ida-ne’e lori rai ida-ne’e ba dalan loos,” Xanana Gusmão hateten.

Iha fatin hanesan Embaixadór Indonézia iha Timor-Leste, Okto Dorinus Manik hateten  ohin loron ksolok ida-ne’e, loron vitória nian ba musulmanu sira.

“Hodi ha’u nia naran, ha’u nia família, no Embaixada Repúblika Indonézia nian, ha’u dezeja Feliz Idul Fitri 1447 Hijriah. Ami hato’o ami nia deskulpa sinseru ba sidadaun Indonézia tomak, no mós ba sidadaun musulmanu Timor-Leste iha Dili no área sira ne’ebé hale’u. Momentu ne’e espesiál tebes, tanba iha semana hirak liubá ita mós selebra ona loron Nyepi, tuir kedas ho Tinan Foun Xinés, no daudaun ne’e sarani Katólika sira iha hela períodu ka tempu kuarezma,” Embaixadór Okto Dorinus Manik hateten.

Embaixadór Indonézia ne’e  hato’o espesifikamente katak kondisaun iha fulan hirak liubá ladún di’ak. Durante loron 20 resin, konflitu mosu iha Médiu Oriente, no ida-ne’e sai kestaun ida ne’ebé preokupa nasaun  hotu.

“Ami fiar katak lidér sira nasaun nian sei hetan lalais solusaun, tanba situasaun ida-ne’e fó impaktu ba aspetu hotu-hotu moris nian. Aumentu iha folin mina-rai sei tuir fali ho aumentu iha folin nesesidade báziku no nesesidade sira seluk. Ita tenke hasoru situasaun ekonomia ne’e hamutuk. Ita tenke forte, fó liman ba malu, tulun malu, suporta malu, no reza ba malu,”nia hateten.

Ba sidadaun Indonézia tomak iha Timor-Leste,  mensajen mak forte nafatin no hamutuk nafatin hodi hasoru dezafiu hotu-hotu, tenke haburas hamutuk ho povu Timor-Leste, tanba ita hotu mesak maun-alin.

Nia hatutan ida-ne’e mak nia Idul Fitri ba dala lima no ikus iha Timor-Leste. Loron balu tuirmai, Embaixadór Akoto Dorinus Manik sei fila fali ba Indonézia no kontinua nia knaar foun iha Papua-Nova Guiné. Nune’e, nia hato’o agradese u’ain ba povu Timor-Leste.

Jornalista : Zita Menezes