Ofisiál F-FDTL Baku Membru SIP Na’in-rua Bainhira Halo Pasarevista Ba Karreta Ida Deskonfia Transporta Sasan Kontrabandu

Hatutan.com, (19 Abríl 2026), Díli —Ofisiál FALINTIL-Forsa Defeza Timor-Leste (F-FDTL) nian ida baku membu Servisu Intelijénsia Polísia (SIP) na’in-rua bainhira sira na’in-rua halo hela pasarevista ba karreta baskulante ida deskonfia transporta sasan kontrabandu husi Fronteira Batugade atu liu mai Díli.

Membru SIP na’in-rua konversa hela ho membru PNTL bainhira sira na’in-rua halo keixa ba DSIK, Segunda (20/04/2026).

Ho aktu ofisiál F-FDTL nian ne’e, Segunda (20/04/2026), vítima na’in-rua  ho naran insiál BdS no ho JTS  ho diviza Ajente Prinsipál Polísia husi SIP husi Komandu Polísia Nasionál Timor-Leste (PNTL) Munisípiu Liquiça,  submete keixa ba iha Diresaun Servisu Investigasaun Kriminál (DSIK) Komandu Jerál PNTL iha Díli.

Informasaun ne’ebé Hatutan.com rekolla husi parte sira haktuir  kronolojia katak bianhira karreta baskolante ne’e sai husi fronteira Batugade, membru SIP na’in-rua ne’e simu orientasaun atu bele tau-matan ba karreta refere. Nune’e, karreta ne’e bainhira tama iha área jurizdisaun PNTL Liquiça nian halai ho velosidade, membru SIP na’in-rua foti inisiativa uza karreta ki’ik duni tuir.

Ikus mai motorista kondus karreta baskolante ne’e para no halai lakon tiha. Ofisiál F-FDTL ne’e to’o iha fatin karreta baskolante para ne’e bolu kedas membru SIP na’in-rua ba komandu PNTL Liquiça.

Bainhira to’o iha edifisu Komandu PNTL Liquiça fó tiha bee ba membru SIP na’in-rua ne’e hemu, derrepenti de’it ofisiál F-FDTL ida baku kedas membru SIP ida hodi monu tama to’o meza okos.

Membru SIP  seluk tenta  komunika didi’ak no husu deskulpa hodi halo kooperasaun, maibé pesoál F-FDTL ne’e fila  baku tan membru SIP ne’e.

Iha ámbitu tomada de posse ba komandante PNTL Munisípiu sira iha Kuartel Jerál PNTL, Hatutan.com tenta konfirma ho portavós   PNTL  Superintendente Xefe Polísia João Belo dos Reis, maibé  seidauk fó komentáriu tanba seidauk simu relatóriu kompletu kona-ba kazu ne’e.

“Ha’u lakohi ko’alia ida-ne’e lai, tanba ha’u seidauk simu relatóriu. Karik ohin ka aban, ha’u simu ona, semana oin, ha’u bele fó informasaun ba públiku,” Superintendente Xefe Polísia João Belo dos Reis afirma.

Jornalista: Marcelino Tomae