Justisa & Krime
Kazu Ofisiál F-FDTL Baku Membru SIP Na’in-Rua Rejistu Ona ho NUC: 0142/26.PNSIC
Hatutan.com, (21 Abríl 2026), Díli– Kazu ofisiál FALINTIL -Forsa Defeza Timor-Leste (F-FDTL), ne’ebé baku membru Servisu Informasaun Polísia (SIP) na’in-rua iha Munisípiu Liquiça rejistu ona ho NUC:0142/26.PNSIC.
Dezeñu animadu ida hosi soldadu ida ne’ebé hatudu nia forsa uza boiña verde. Ilustrasaun
Informasaun ne’ebé Hatutan.com asesa, Tersa (21/04/2026), katak parte Polísia Nasionál Sientífiku Ivestigasaun Kriminál (PNSIC, sigla portugés) rejistu ona prosesu kriminál no Imputa bá krime tolu hanesan ofensa bá integridade fízika simples, abuzu podér, no krime sekuestru hodi submete autos bá Ministériu Públiku.
Krime ofensa bá Integridade fízika simples previstu iha artigu 145, krime abuzu podér previztu iha Artigu 297 no krime Sekuestru Artigu previstu 160 artigu Kódigu Penal Timor-Leste.
Ekipa PNSIC prepara ona autos, tempu badak aprezenta bá Ministériu, tanba kazu ho tipu krime tolu ne’ebé deskonfia ofisiál F-FDTL baku membru SIP na’in-rua iha Munisípiu Liquiça bainhira halo hela pasarevista ba karreta baskulante ida deskonfia transporta sasán kontrabandu husi Fronteira Batugade atu liu mai Díli.
Fó hanoin fali katak ofisiál FALINTIL-Forsa Defeza Timor-Leste (F-FDTL) nian-ida baku membu Servisu Intelijénsia Polísia (SIP) na’in-rua bainhira sira na’in-rua halo hela pasarevista ba karreta baskulante ida deskonfia transporta sasan kontrabandu husi Fronteira Batugade atu liu mai Díli.
Ho aktu ofisiál F-FDTL nian ne’e, Segunda (20/04/2026), vítima na’in-rua ho naran insiál BdS no JTS ho diviza Ajente Prinsipál Polísia husi SIP husi Komandu Polísia Nasionál Timor-Leste (PNTL) Munisípiu Liquiça, submete keixa ba iha Diresaun Servisu Investigasaun Kriminál (DSIK) Komandu Jerál PNTL iha Díli.
Informasaun ne’ebé Hatutan.com rekolla husi parte sira haktuir kronolojia katak bainhira karreta baskolante ne’e sai husi fronteira Batugade, membru SIP na’in-rua ne’e simu orientasaun atu bele tau-matan ba karreta refere. Nune’e, karreta ne’e bainhira tama iha área jurizdisaun PNTL Liquiça nian halai ho velosidade, membru SIP na’in-rua foti inisiativa uza karreta ki’ik duni tuir.
Ikus mai motorista kondus karreta baskolante ne’e para no halai lakon tiha. Ofisiál F-FDTL ne’e, to’o iha fatin karreta baskolante para ne’e bolu kedas membru SIP na’in-rua ba komandu PNTL Liquiça.
Bainhira to’o iha edifisu Komandu PNTL Liquiça fó tiha bee ba membru SIP na’in-rua ne’e hemu, derrepenti de’it ofisiál F-FDTL ida baku kedas membru SIP ida hodi monu tama to’o meza okos.
Membru SIP seluk tenta komunika didi’ak no husu deskulpa hodi halo kooperasaun, maibé pesoál F-FDTL ne’e fila baku tan membru SIP ne’e.
Jornalista: Marcelino Tomae