Régio da Cruz Salu Fila Ba Prezidente RAEOA Mézmu iha Rejistu Kriminál

Hatutan.com, (22 Abríl 2026), Díli–IX Governu Konstitusionál liu-husi reuniaun Konsellu Ministru Ordináriu, Kuarta (22/04/2026), aprova ona projetu Rezolusaun ne’ebé aprezenta husi Ministru Administrasaun Estatál, Tomás do Rosário Cabral, bá ezonerasaun dirijente servisu iha Rejiaun Administrativa Espesiál Oe-Cusse Ambeno (RAEOA) ne’ebé nomeia liuhosi Rezolusaun Governu n. 37/2025, loron 27 fulan-Agostu, no nomeia bá Prezidente, Sekretáriu no Diretór Rejionál sira RAEOA nian.

Lee Mós: Envolve Kazu Kontrabandu, Tribunál Oé-Cusse Aplika Pena Multa Ba Arguidu Regio Salu Atuál PA-RAEOA ho Arguidu Seluk Tan

Régio da Cruz Salu. Foto/Dok.Espesiál

Ho Rezolusaun ida-ne’e, Diretór-Jerál Rejionál no Diretór Rejionál sira ne’ebé hala’o hela funsaun hetan ezonerasaun, no Régio da Cruz Salu hetan nomeasaun nu’udar Prezidente RAEOA.

Komunikadu imprensa ne’ebé Hatutan.com asesu husi pajina ofisiál Governu nian haktuir Konsellu Ministru mós nomeia s Sekretáriu Rejionál sira maka hanesan Salvador da Cruz, ba Administrasaun no Finansas, Francisco Loca, ba Planeamentu no Dezenvolvimentu, no mós Merita Marques Lafo, ba Asuntu Sosiál no Organizasaun Komunitária.

Tuir mai, hetan mós nomeasaun nu’udar Diretór Servisu Rejionál sira hanesan: Domingos Punef, Adelaide Rosália Faria Correia, Amâncio Aguido Punef, Augusto Jorge de Fátima Efi, Mário Coel, Anita da Costa Ruing, Vicêncio Cono, Odete Amado Martins, André Lao, Remígio Nuno Sila, Yoseph Ili, José Oki, Anastásia Eni, Fátima Olga Hei Amaral, Tomás José Tanessib Anuno, Júlio Coel, Domingos de Almeida, Orlando Quelo, José Ase Neno Colo, Cândido dos Reis Amaral no Jaime Taeque.

Titulár kargu sira ne’e sujeita ba avaliasaun dezempeñu anuál, no simu klasifikasaun ne’ebé la satisfatóriu sai baze hodi ezonera sira.

Régio Salu iha rejistu kriminál

Hanesan públika ona katak Régio da Cruz Salu iha rejistu kriminál tanba kondenadu ba kazu kontrabandu hodi “futu-lia” importa adubu ka pupuk illegal mai Oé-Cusse liuhusi jalan tikus.

Iha loron 27 Marsu 2026, Tribunál Judisiál Primeira Instánsia Oé-Cusse, liu husi Juiz Evangelino Belo, hasai desizaun finál ba kondenadu Régio da Cruz Salu ho kondenadu Cesario Romeia da Cruz Salu, Juvinal Romeia da Cruz Salu ho Yensensius Meko, ho pena multa  ho montante US$240.00.

Despaixu Akuzasaun Ministériu Públiku ba Régio Salu ho nia maun-alin sira iha kazu kontrabandu. Foto/dok.Repro

Medida aplikasaun selu multa ne’e kada loron kondenadu Régio da Cruz Salu, kondenadu Cesario Romeia da Cruz Salu, Juvinal Romeia da Cruz Salu ho Yensensius Meko tenke selu US$2.00 kada ema  durante to’o loron-80. Bainhira kondenadu sira la kumpre pena multa ne’e maka sei aplika pena prizaun afetivu loron 80 ba kondenadu sira. 

Iha akordaun ne’ebé  lee sai husi  Juiz Evangelino Belo, katak Tribunál kondena Régio da Cruz Salu atuál prezidente Autoridade Rejiaun Administrativu Oé-Cusse Ambeno (PA-RAEOA) ho kondenadu Cesario Romeia da Cruz Salu, Juvinal Romeia da Cruz Salu ho Yensensius Meko, provadu envolve iha kazu krime kontrabandu.

Tuir akuzasaun Ministériu Públiku (MP) ne’ebé  Hatutan.com asesa, katak iha indísiu  sufisiente kona-bá pratika krime ne’ebé komete husi  Régio da Cruz Salu ho Cesario Romeia da Cruz Salu, Juvinal Romeia da Cruz Salu ho Yensensius Meko iha prosesu fasilita hatama ilegál produtu agríkola husi teritóriu Atambua, Wini-Indonézia mai teritóriu Timor-Leste, liu husi área Sacato, Oé-Cusse.

Produtu sira ne’e inklui  pupuk kompostu makro, pupuk kompostu mikro, herbisida kontaktu la selektivu, kafé Econaxx, bebida LVNXLIM sabor laranja ho fibra aas, ekstratu erva Herbal Slim (atu reduz gordura), serum LVN ba kuidadu pele no produtu agríkola seluk  hamutuk  kaixa 37  no adubu (pupuk) kaixa 67.

Informasaun ne’ebé iha katak pupuk sira ne’ebé kondenadu Régio Salu sira sosa hodi importa ilegál mai Oé-Cusse tanba  pupuk sira ne’e iha  Indonézia kategoria subsídiu. nune’e  la bele fa’an.

Iha kronolojia ne’ebé kontempla iha dokumentu akuzasaun Ministériu Públiku nian, katak iha  loron 30 fulan Juñu tinan  2012, Régio da Cruz Salu  sosa produtu agríkola sira iha rejiaun Jawa Osidentál- Indonézia ho presu  Rp6.000.000 (mil US$354,42) depois haruka ba Atambua no rekuta sidadaun Indonézia na’in-rua atu transporta ilegalmente produtu sira husi Atambua ba Wini-Indonézia, ne’ebé iha fronteira ho Timor-Leste.

Husi Wini, sidadaun Indonézia na’in-rua ne’e hatama ilegalmente produtu sira mai Timor-Leste, liu-liu iha área Sacato, Oé-Cusse. Nune’e, produtu sira to’o kondenadu  Yensensius Meko simu  sasan kontrabandu ne’e iha nia rezidénsia  Sacato, Oé-Cusse hodi hein instrusaun tuirmai.

Kondenadu  Juvinal Romeia da Cruz Salu asume responsabilidade atu orienta kondenadu Cesario Romeia da Cruz Salu  foti produtu kontrabandu sira iha kondenadu Yensensius Meko nia ezidénsia  iha Sacato, uza karreta marka Suzuki Splash.

Bazeia ba atividade sira ne’e, Unidade Patrullamentu Fronteira (UPF) halo intervensaun no deskobre partisipasaun konjunta husi Régio Salu ho nia maun-alin  kondenadu Cesario Romeia da Cruz Salu, Juvinal Romeia da Cruz Salu ho Yensensius Meko envolve  iha atividade importasaun ilegál.

Jornalista: Marcelino Tomae