Rekrutamentu Foun Ba Kadetas PNTL Posibilidade iha Fulan-Maiu

Hatutan.com, (22 Abril 2026), Díli– Ministru Interiór (MI) Francisco da Costa Guterres, hateten kona-bá prosesu rekutamentu foun ba kadetas Polisia Nasionál Timor-Leste (PNTL) hein de’it ona  despaxu diploma Ministérial no posibilidade prosesu rekrutamentu sei hala’o iha fulan-Maiu tinan 2026.

Lee Mós: Governu Arkiva Rekrutamentu PNTL 2025 no Orienta Loke Prosesu Foun

Ministru Interiól, Francisco da Costa Guterres. Foto/Dok.Juvinal Cabral dos Santos

“Ami prepara hela, hein de’it ona despaxu diploma Ministérial hodi bele prepara rekizitu no prosesu teste nian.  Iha Tersa (21/04/2026), Komandu Jerál PNTL halo enkontru ikus ho instituisaun relevante sira hotu ona,” Francisco da Costa Guterres informa ba jornalista sira iha Palásiu Governu, Kuarta (22/04/2026).

Membru Governu ne’e  hateten bainhira  despaixu diploma Ministérial sai ona bele hahú fila-fali prosesu rekutamentu ne’e rasik, no  numeru kadetas nafatin 400 depois mak loke tan.

“Ne’ebé ha’u hanoin sé la’ós fulan-Abríl nia laran, entaun fulan-Maiu ita hahú fali ona, intermu orsamentu la presiza barak ona. Ita só presiza de’it mak pisiko teste ho teste saúde  no kona-bá prová kultural ita sei servisu hamutuk ho Komisaun Funsaun Públika (KFP) ne’ebé sira sei providénsia sasan sira ne’e hotu uza para hodi halo teste,” Francisco da Costa Guterres hateten.

Nia hatutan tán katak rezoluzaun mós dehan ona katak kadidatu sira ne’ebé foin lalais  liu tiha ona prová dokumentál hamutuk 2000 itál kandidatu hirak ne’e mak sei mai tuir fali teste.

Jornalista : Zita Menezes