Arguidu sira Ba Kazu Jogu Online Na’in-11 Tenta Halai Husi Teritóriu Timor-Leste

Hatutan.com, (01 Maiu 2026) Dili-Polisia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) detein  sidadaun estranjeiru na’in-11 ne’ebé deskonfia envolve iha jogu online iha Zita Plaza no Colmera, iha tinan kotuk, no  tenta atu  halai husi teritóriu Timor-Leste liuhusi área fronteira terrestre Suai atu ba  Indonézia.

Lee Mós: Tribunál Aplika Medida Tolu Bá Arguidu Sira Kazu Jogu Online iha Zita Plaza no Colmera

Polísia detein suspeitu jogu online na’in-11 ne’ebé tenta halai husi teirtóriu Timor-Leste, Kinta 30 Abríl 2026. Foto/Juvinal Cabral dos Santos

Tribunál Judisiál Primeira Instánsia Díli (TJPID) aplika ona medida koasaun aprezentasaun periódika, semana-rua dala ida, iha Ministériu Públiku (MP), ba arguidu sira maioria sidadaun estranjeiru ho nasionalidade Xina ne’e, maibé iha Kinta, 30 Abríl 2026, hale’u tuku 09:00 dadeer Otl, arguidu sira iha  intensaun atu halai sai husi Dili ba Suai tenta ultrapasa  fronteira ba Indonézia.

“Kuandu ami simu informasaun husi ita-nia servisu sekreta sira, ha’u orienta kedas parte eskuadra hamutuk ho tránzitu halo auto stop  atu bele deteta sidadaun estranjeiru ne’ebé atu ba  Suai hodi hakat liu fronteira ba Indonézia,” Komandante PNTL Munisípiu Ainaro, Superintendente-Xefe Emilio dos Santos, informa ba jornalista sira iha Kuartel Jerál PNTL , Sesta (01/05/2026).

Komandante Polísia Munisípiu Ainaro ne’e infroma Kinta- lokraik, hale’u tuku 16:00 Otl, konsege hapara tiha karreta ne’e halo auto stop identifika sidadaun estranjeiru sira ne’e sa’e bus diresaun Suai-Dili iha bus laran hamutuk ho ajudante no motorista  sira na’in-16.

“Ita iha Timoroan ida mak fó hela dalan sira para sira bele hakat liu ba Indonézia, sidadaun estranjeiru hamutuk na’in-11, ita asegura iha Komandu Munisípiu Ainaro, ohin, ita transporta mai hodi entrega fila-fali ba iha Diresaun Servisu Investigasaun Kriminál (DSIK) atu halo prosesu kontinuasaun,” Superintendente-Xefe Polísoa Emilio dos Santos hateten.

Nia afirma, bainhira asegura tiha sidadaun estranjeiru sira ne’e kontaktu kedas mai iha Diretór DSIK nia informa katak sidadaun sira ne’e iha hela prosesu ida liga ba kazu sira ne’ebé mak anteriormente iha tiha ona Ministériu Públiku (MP).

Iha fatin hanesan motorista Carlos da Costa ne’ebé kondus Bus diresaun Suai-Dili ne’ebé tula sidadaun estranjeiru ho nasionalidade Xina ne’e hateten, mata dalan ne’e telefone atu aluga ba to’o iha Suai, maibé seluk tan ne’e nia lahatene.

“Ami tula sira iha Manleu besik Kapela nian mak bá to’o iha Kassa-Ainaro mak tránzitu sira  hapara ami iha ne’ebá, karreta ne’e sira aluga ho kontratu US$200.00 sira dehan hatun iha Suai de’it,”  Carlos da Costa hateten.

Suspeitu sira envolve iha jogu online iha Zita Plaza ho Colmera iha tinan 2025 tenta halai husi teritóriu Timor-Leste. Foto/Juvinal Cabral dos Santos

Nia haktuir, iha karreta laran ne’e sira tula sidadaun estranjeiru na’in-11 no ida mata dalan ne’e mak hamutuk na’in-12, inklui ho ajudante no nia rasik hamutuk ema na’in-16 mak karreta bus laran husi Dili ba Suai.

“Ami tula sira iha Manleu ne’e hale’u tuku 09:00 dader, to’o iha Ainaro hale’u tuku 15:30 resin,” motorista Carlos da Costa haktuir.

Tuir kondutór bainhira sai husi Dili to’o iha dalan klaran oras tuku 12:00 Otl atu para han tiha lai, maibé sidadaun estranjeiru sira ne’e dehan katak labele para tanba sira ta’uk ema kaer sira, entaun sira halo tuir to’o iha Kassa Tránzitu sira konsege hapara.

Sidadaun estranjeiru nia naran inisial mak MI, ZD, JK, KKS, PG, YA, YMK, AJ, BJT, MR, SAP, inklui ida mata dalan Timoroan ne’e naran inisial OML. Aleinde ne’e mós asegura evidensia sira mak telefone total-20, Laptop-tolu, pasaporte ida, speaker ida no motor eletriku scoter ida.

Fó hanoin fali katak, buska no apreensaun iha Kinta-kalan, 09 fulan-Outubru 2025, Polísia hetan informasaun husi komunidade sira katak, depois anunsiu governu nian katak jogu online hotu-hotu bandu mais iha fatin balun sei loke nafatin. Nune’e informador no komunidade sira informa ba autoridade seguransa lansa operasaun iha tuku 23:00 Otl iha Zita Plaza no mós  iha Colmera nian hodi detein suspeitu na’in-10.

Iha operasaun  ne’e autoridade seguransa deteta suspeitu sira halo prátika jogu online ho prova sira ne’ebé Polísia rekolla iha  parte Zita Plaza nian telefone  Readmi, Realmi, Xiomi hamutuk 68, tablet 1, laptop 5, sim card Telemor 521, Telkomcel 375. Nune’e  operador jogu online iha parte Colmera konsege foti laptop 2, telefone 34,  no seluk-seluk tan.

Jornalista: Juvinal Cabral dos Santos