Hatutan.com, (13 Outubru 2025), Díli– Tribunál Judisiariu Primeira Instánsia Díli (TJPID), lihuhosi  julgamentu primeiru interogatóriu, Domingu (12/10/2025), hatun despaxu tolu   hodi ho aplika medida koasaun tolu  ba  arguidu na’in -10 ne’ebé envolve iha jogu online illegal iha Zita Plaza ho iha Colmera.

Lee Mós: Deskonfia Fasilita Sim Card ba Jogu Online, PNTL Sei Bolu Telemor ho Telkomcel

Tribunál Judiál Primeira Instásia Díli (TJPID). Foto/Dok.

Medida koasaun ne’e mak; ida, prebuisaun  aujénsia, rua, selu $10,000.00, ne’ebé kada arguidu $1,000.00 ba arguidu na’in-10 hamutuk $10,000.00 hanesan garantia ida la bele sai husi teritóriu Timor-Leste no  medida koasaun seluk (tolu) aprezentasaun  periódika  semana ida dala rua iha estasaun polísia ne’ebé besik.

Hafoin remata Primeiru Interogatóriu Asistidu bá arguidu na’in-10 ba kazu jogu online ne’e,  Advogadu Privadu Napoleão  de Oliveira Carvalho, konsidera  despaisu  Tribunál nian ne’ebé  aplika bá   nia kliente na’in-10 hanesan garantia bá prosesu tanba  arguidu sira ne’e sidadaun estránjeiru.

“Karik  Arguidu sira halai husi Timor, konserteza Kaosaun Tribunál la bele foti, tanba Kaosaun ne’e osan ténke bá estadu, tanba Kaosaun  ne’e hanesan hipoteka ida hodi asegura prosesu ne’e nia andamentu,”  Advogadu Privadu  Napoleão de Oliveira Carvalho hateten bá Jornalista sira iha resintu TJPD Díli, Segunda (13/10/2025).

Advogadu ne’e konsidera,  desizaun Tribunál, bá ema hotu, katak justu bá ema ne’ebé la gosta atividade jogu online, maibé injustu bá sira ne’ebé gosta  jogu online.

“Desizaun Tribunál ne’e ita labele dehan adekuadu ka ita la bele dehan  justu, justu bá ema ema ida-ne’ebé  maka simu, maibé la justu bá ema ne’ebé la simu,”  nia hateten.

Jornalista: Marcelino Tomae