Jet Privadu husi Jakarta Tun iha Aeroportu INPL, Deskonfia Atu Transporta Sespeitu Na’in-tolu iha Relasaun ho Kazu Scam Call Centre

Hatutan.com, (02 Jullu 2026), Díli—  Aviaun jet privadu ho tipu Cessna Citation 700 Longitude (C700) rejistrasaun  Indonézia tun iha Aeroportu Internasionál Prezidente Nicolau Lobato (INPL) ho objetivu ne’ebé la klaru.

Tipu aviaun Cessna Citation 700 Longitude (C700). Foto/Aviation International News

Jet privadu charter ne’e tuir informasaun katak sai  husi Aeroportu Halim Perdana Kusuma-Jakarta mai Díli, Timor-Leste no tun iha Aeroportu INPL por volta 17:15 Otl.

Informasaun ne’ebé Hatutan.com rekolla husi fontes servisu informasaun sekreta iha Aeroportu INPL katak aviaun jet prvadu ne’e charter husi emboot balun iha Timor-Leste (fontes husu atu labele públika ema refere nia identidade no nia pozisaun) atu transporta sidadaun estranjeiru na’in-tolu ho nasionalidade Indonézia atu fila ba Sumatera-Indonézia.

Desde tuku 17:15 to’o fali tuku 23:57 Otl, autoridade kompetente sira, kompostu husi Polísia Nasionál Timor-Leste, Servisu Informasaun Polísia (SIP), investigador husi Diresaun Servisu Investigasaun Kriminál (DSIK), Servisu Nasionál Intelijénsia (SNI), Autoridade Administrasaun Aeroportu no Navegasaun Timor-Leste, Empreza Públika (ANATL,E.P) ho Servisu Migrasaun (SM) kontinua tau-matan no asegura ba sidadaun na’in-tolu ne’ebé atu sai ho  jet privadu ne’e.  

“Ema na’in-tolu ne’e atu sai ho aviaun jet privadu ne’e, konfesa katak sira la hatene buat ida, maibé ajénsia  ne’ebé  aluga aviaun ne’e maka temi fali emboot balu nia naran, tanba ne’e mak, ita-nia Polísia sira asegura hela ema  na’in-tolu,” fontes Servisu Sekreta informa.

Autoridade seguransa sira deskonfia forte sidaduan na’in-tolu ho nasionalidade Indonézia ne’e iha relasaun ho atividade ilísitu scam call centre iha Tibar, Postu Administrativu Bazartete, Munisípiu Liquiça. Maibé, parte relevante sira kontinua haktuir katak atu bele hetan nia klaridade ba informasaun presiza iha investigasaun kl’ean husi parte Polísia.

Observasun Hatutan.com iha resintu Aeroportu Internasionál Prezidente Nicolau Lobato to’o Kinta-ne’e, (02/07/2026), hale’u tuku 00:22 Otl,  hatudu katak   Polísia Nasionál  Timor-Leste (PNTL) liu-liu Diresaun Servisu Investigasaun Kriminál (DSIK), servisu hamutuk SNI asegura sidadaun na’in-tolu ne’ebé tenta atu halai sai ho Jet privadu ne’e.

Situasaun iha resintu Aeroportu INPL, Kuarta-kalan (01/07/2026).

Mézmu iha inisiu informasaun katak aviaun jet privadu ne’e charter husi emboot balun, maibé bainhira autoridade kompetente sira kofirma ba emboot refere no emboot ne’e orienta nia pesoál sira to’o direta iha Aeroportu IPNL konfirma ba autoridade sira katak emboot refere laiha koñesimentu ba aviaun jet privadu ne’e ho nia objetivu.

To’o notísia ne’e públika, autoridade kompetente sira seiduk bele fó sai informasaun ba mídia ka jornalista sira tanba sei iha prosesau investigasaun nia laran.

Iha loron 26 fulan-Juñu 2026, PNTL liu-husi ekipa Diresaun Servisu Investigasaun Kriminal (DSIK) halo operasaun  hodi detein  Indonéziu na’in-61 iha Tibar, Munisípiu Liquiça, tanba deskonfia halo atividade ilísitiu scam call center no jogu online.

Iha audénsia juglamentu primeira interogatóriu iha Tribunál Judisiál Primeira Instánsia Díli (TJPID) liu husi Juíza Ercilia de Jesus, hatun despaixu aplika prizaun preventiva ba jerente jogu  ilísitu no scam call centre no ba arguidu na’in-60 seluk aplika medida aprezentasaun periódika ho koasaun US$2,500 kada ema.

Arguidu na’in-61 ne’e nu’udár sidadaun estranjeiru ho nasionalidade Indonézia.

Ministru Interiór, Francisco da Costa Guterres, ba jornalista iha Palásiu Governu hafoin reuniaun Konsellu Ministru, Kuarta (01/07/2026), kofirma  mós katak Servisu Migrasaun no PNTL kontinua halo operasaun hamutuk hodi  asegura katak ema hotu tuir lei no prevene atividade ilegál hanesan scam call centre iha rai-laran.

Ekipa Hatutan.com