Governu Timor-Leste análize hela matéria penál kooperasaun internasionál kona-bá estradisaun fujitivu Kalumban Mali

Reportajen: Felix Fernandes

 Hatutan.com, (30 Setembru 2026) Díli– Governu liu husi Ministériu Justisa (MJ)   análize  hela matéria lei  penál kooperasaun internasionál  kona-bá   prosesu estradisaun fujitivu Kalumban Mali  alias Leonardo Benigno Tilman, sidadaun Indonéziu ne’ebé  halai husi justisa  iha Nusa Tenggara Timur (NTT)  mai subar iha Timor- Leste tinan barak ona no deskonfia fasifika dokumentu to’o sai sidadaun Timorense.

Ministru Justisa, Sergio da Costa Hornai. Foto/dok.

Ministru Justisa, Sérgio da Costa Hornai, konfirma katak kona-bá fujitivu Kalumban  Mali, atoridade sentrál sei halo médida iha kestaun administrativa sira, liu-liu kona-bá matéria penál kooperasaun internasionál ninian ne’ebé  Governu administrativa hela.

“Sei iha autoridade sentrál atu halo medida. Ita ko’alia kona-bá  lei kooperasaun matéria penal internasionál, autoridade sentrál mak hanesan prokuradór jerál to’o  iha Tribunál sira. Ita ko’alia kona ba perspetiva kabe bá iha Guvernu atu haree  kona-bá médida sira oinsá atu halo estradisaun,” Ministru  Justisa Sérgio da Costa Hornai informa hodi responde Hatutan.com iha Palásiu Governu, Kuarta (30/09/2026).

Nia  subliña, kona-bá análize relatóriu fujitivu  Kalumban Mali atu deporta fila bá nia paíz orijen hanesan Indonézia,  autoridade sentrál  atu halo medida iha prosesu kazu  refere daudaun autoridade judisiáriu  administrativa hela.

Fó hanoin fali katak, fujitivu Kalumban Mali ne’ebé deskonfia kometa falsifikasaun dokumentu hodi hetan nasionalidade Timor ho naran Leonardo Benigno Tilman, sai sensitivu no dilemátiku ba Polísia Sientifiku Investigasaun Kriminál (PCIC, sigla portugés)  tanba ema ho podér politíku no ema balun tan  ho pozisaun boot mak proteze no fó hela kondisaun ba Kalumban Mali hodi la’o livre iha Timor-Leste.

Fujitivu Kalumban Mali  halai husi Justisa Indonézia,  tanba envolve kazu korrupsaun fornesimentu adubu ka pupuk ho kuantidade tonelada  575 ho valor orsamentu millaun Rp.976.

Kalumban Mali nu’udár Diretór CV Eka Cipta Persada ne’ebé hetan detensaun dezde loron 28 fulan-Fevereiru 2014. Molok ne’e, iha fulan-Jullu tinan 2013, Kalumban Mali sai hanesan kandidatu membru lejislativu husi Partidu  Amat Nasonal (PAN) bá DPRD-NTT.

Iha Kuarta, 05 fulan-Juñu tinan 2023,  hale’u tuku 16:00 Otl, PCIC halo kapturasaun no detensaun ba  fujitivu Kalumban Mali  iha nia rezidénsia iha Fomento, Díli.

Autoridade PCIC kaptura no detein fujitivu Kalumban Mali relasiona ho informasaun katak  dekonfia nia kaer ilegalmente dokumentu sidadania Timor nian  hodi troka nia naran ba  Leonardo Benigno Tilman husi Munisípiu Bobonaro.

Iha detensaun no kapturasaun ne’e, PCIC asegura dokumentu importante sira hosi Kalumban Mali alias Leonardo Benigno Tilman, hanesan sertidaun moris nian ne’ebé deskonfia atribui  husi indivíduu balu iha Ministériu Justisa Timor-Leste, Billete Identidade Timor-Leste no sertidaun kazamentu husi Parókia ida ne’ebé hola parte iha Arkidioseze Metropolitana Díli.

Fujitivu Kalumban Mali nia orijen husi Lamaknen, Postu Administrativu Atambua, Provínsia Kupang, Nusa Tengara Timur. (*)