Durante Períodu Finadu, Mosu Asidente 23 no Rezulta Vitíma ida Lakon Vida

Jornalista: Maria Angelita Sandi Belo

 Hatutan.com, (5 Novembru 2026), Díli–Diresaun Nasionál Tránzitu Seguransa Rodoviária  (DTSR) rejista asidente hamutuk 23 ne’ebé akontese iha Timor-Leste hodi rezulta vitíma ida lakon vida durante selebrasaun finadu husi loron 29 Outubru to’o 04 Novembru 2026.

Diretór DTSR, Superintendente Xefe Polísia João da Costa. Foto/Maria Angelita Sandi Belo

Diretór DTSR, Superintendente Xefe Polísia João da Costa, Kinta (5/11/2026), informa durante loron 29 to’o fali loron 31 Outubru liubá, abitante barak husi Díli halo dezlokasaun ba munisípiu sira seluk iha teritóriu nasionál hodi selebra loron finadu.

Iha fali loron 4 Novembru, abitante sira ne’e fila-fali husu munisípiu  idaidak mai Dili. Nune’e, durante perídu ne’e, Polísia Nasionál Timor-Leste husi Diresaun Nasionál Tránzitu Seguransa Rodoviária  (DTSR) rejista asidente hamutuk 23 no husi asidente sira-ne’e, vitíma ida mak lakon vida.

“iha kazu asidente 23 ne’e, rejista ema kanek kaman na’in-20, kanek todan na’in-haat no na’in-ida mak lakon vida,” Superintendente Xefe Polísia João da Costa haktuir ba jornalista sira iha nia servisu fatin.

Númeru asidente ne’ebé akontese hatudu Munisípiu Díli mak rejista kazu ho númeru aas (asidente 10), munisípiu Aileu rejista asidente tolu, Baucau (tolu), Liquiça (tolu) no iha munisípiu sira seluk ne’e  mosu kazu asidente ho numériu ida-ida de’it.  

Husi númeru asidente 23 ne’e, iha kazu  ida mate ne’e kontinua prosesu ba Tribunál, kazu hitu seluk iha prosesu nia laran no kazu 15 rezolve tuir família.

Fatór sira ne’ebé kontribui ba hamosu asidente sira-ne’e, Superintendente Xefe Polísia João da Costa, hateten kuaze pursentu 95 husi ema (neglijénsia umana) no porsentu 5 tanba kondisaun transporte. (*)