Justisa & Krime
Membru PNTL Faustina Saldanha Cardoso Kumpre Prizaun Tinan Haat
Hatutan.com, (18 Outubru 2021), Dili—Membru Polísia Nasionál Timor-Leste (PNTL), Faustina Saldanha Cardoso, ohin, submete hodi kumpre pena prizaun tinan haat iha Prizaun Gleno, tanba komete krime falsifikasaun dokumentu ho burla agravadu.
Membru PSIK transporta Faustina Saldanha Cardoso ho karreta kór mutin ho númeru matrikula 06.243 G, lori ba kumpre pena prizaun tinan haat iha prizaun Gleno, Munisípiu Ermera, Segunda (18/10/21). Foto/Hatutan.com
“PSIK kaptura membru PNTL ne’e tanba, ezekuta mandadu hosi Tribunál no desizaun interrogatóriu ohin (18/10/2021), rezultadu definitivu hetan pena prizaun tinan haat ba krime burla agravadu ho falsifikasaun dokumentu,” Portavós PSIK, Octávio da Costa Araújo, hateten ba jornalista-sira iha edifisiu PSIK Kaikoli, Segunda (18/10/21).
Tuir kronolójia, membru PNTL ne’e komete ona krime burla agravadu ho falsifikasaun dokumentu iha tinan 2019, no tuir ona primeiru interogatóriu iha Tribunál Distritál Dili (TDD).
Rezultadu hosi prosesu ne’e, TDD hasai desizaun hodi aplika pena prizaun preventiva durante fulan neen iha Prizaun Becora.
Hafoin kumpre fulan neen iha prizaun Becora, Faustina Saldanha Cardoso bele livre, maibé konkluzaun ba kazu ne’e seidauk remata, tanba iha hela faze kontinuasaun ba prosesu.
Bainhira TDD hasai fali notifikasaun hodi bolu Faustina Saldanha Cardoso atu ba tuir tán julgamentu iha Tribunál, maibé nia rasik la kumpre karta notifikasaun ne’e.
Nune’e, iha loron rua antes halo detensaun, TDD emite mandadu kapturasaun ba PSIK atu buka-tuir Faustina Saldanha Cardoso hodi kaptura.
Bazeia ba mandadu hosi Tribunál, iha Sesta (15/10/2021), oras meiudia, PSIK ezekuta órden TDD no konsege detein duni Faustina Saldanha Cardoso iha rezidénsia, iha área Surikmas, iha sela PSIK durante oras 72 tuir lei.
Depois kumpre tiha oras 72, iha segunda 18 Outubru 2021 dadeer, membru PSIK transporta kedan Faustina Saldanha Cardoso ba tuir julgamentu iha Tribunál Distritál Dili (TDD), hodi rona desizaun finál, no ikus mai TDD aplika duni pena prizaun tinan haat.
Observasaun Hatutan.com iha edifísiu PSIK nota, membru PSIK transporta ona Faustina Saldanha Cardoso ho karreta kór mutin ho númeru matrikula 06.243 G, lori ba kumpre pena prizaun tinan haat iha prizaun Gleno, Munisípiu Ermera.
Prosesu inisiál ba Faustina Saldanha Cardoso nia kazu ne’e, akontese iha 2019 no PSIK rasik mak halo atendimentu ba prosesu ne’e to’o konkluzaun.
Jornalista: Rogério Cárceres