UPF Halo Apreensaun ba Sigaru Pakote 373, Suspeitu Halai Lakon

Hatutan.com, (18 Novembru 2021), Dili—Komandu Polisia Nasionál Timor-Leste (PNTL), Unidade Patrullamentu Fronteira (UPF), liuhosi intensifikasaun atividade operasaun, konsege halo aprensaun evidénsia sira hanesan sigaru ho marka Surya 12 hamutuk pakote 373, inklui sasan seluk tán, hosi sidadaun sira ne’ebé halo transaksaun ilegál iha liña fronteira.

Tabaku Ilegál ne’ebé UPF halo apreensaun iha Fronteira, Kuarta (17/11/21). Foto/PNTL.

Parte UPF, Kompañia Alfa, Postu Altu Lebos, Munisípiu Bobonaro la konsege halo detensaun ba suspeitu sira, tanba halai lakon.

Notísia iha Relasaun:Deskobre fukun-sira fó espasu ba pasajen ilegál buras iha fronteira

Prosesu aprensaun ba sasan ilegál hirak ne’e, iha Kuarta 17 Novembru 2021, tempu kalan bainhira sidadaun sira ne’e hala’o atividade komérsiu ilegál iha área  fronteira entre nasaun Indonézia no Timor-Leste (TL).

Komandante UPF, Superintendente Euclides Belo, informa  sasan ilegál ne’e, prende tanba UPF hamutuk ho membru FALINTIL Forsa Defeza Timor-Leste (F-FDTL), Polisia Militár (PM), ne’ebé halo operasaun rutina iha fronteira rai-maran TL ho Indonézia nian.

“Loos duni, horisehik Komandante Postu UPF Postu Alto Lebos, Primeiru Sarjentu Adelino Maumali, hamutuk ho membru na’in-tolu  hala’o patrullamentu la’o ain ba área Mapelai Suku Lebos, konsege identifika atividade transaksaun ilegál no prende sasan ilegál sira hanesan, sigaru marka Surya 12 hamutuk pakote 373, tabaku marka pohon sagu kaixa 10, tabaku marka Matahari kaixa ida (1), petasan ualu (8) shoot (foguetes) hamutuk pakote 10, inklui fogete 55 shoot ho nia pakote hamutuk 20,” Superintendente Euclides da Costa Belo, hateten ba Hatutan.com via WhatsApp, Kinta (18/11/21).

Fogetes Ilegál ne’ebé UPF halo apreensaun iha Fronteira, Kuarta (17/11/21). Foto/PNTL.

Hafoin halo apreensaun ba sasán komersiál sira ne’e, membru UPF ho F-FDTL, lalin objetu sira ne’e ba Postu UPF ho distánsia ne’ebé dook no oras-ne’e entrega ona ba Komandu PNTL Munisípiu Bobonaro, hodi halo prosesu kontinuasaun.

“Polisia hetan mak evidénsia de’it na’in dezvia antes,” Komandante Euclides Belo, hateten tán.

UPF hamutuk ho membru F-FDTL, sei kontinua intensifika área kobertura hodi identifika atividade transaksaun illegal-sira, hodi evita tama iha teritóriu nasionál.

Jornalista: Rogério Cárceres