Yohan orgullu bele partisipa iha kurrida internasionál iha Dubai, hodi hadi’a nia pontus no ikus mai kualifikadu ba jogu Olimpico iha Beijing, Xina.
“Ha’u kontente tebes tanba dala ida tán ha’u bele reprezenta ha’u nia inan nia rain iha jogu internasionál ida hanesan jogu Olimpico. Hau mós sente orgullu maski ha’u tenke serbisu makás hodi bele hetan osan oitoan no ho suporta hosi bolsu estudu hosi Komité Olimpico Internasionál liu hosi Komite Olimpico Timor-Leste hodi bele treina no partisipa iha kompentisaun balun,” Yohan espresa, liu hosi komunikadu ne’ebé publika hosi Federasaun Ski TL.
Iha momentu balun ne’ebé nia triste, kuandu partisipa iha eventu boot sira hanesan kompetisaun ski mundiál no haree atleta seluk mai ho sira nia ekipamentu foun ho ekipa lojístika ne’ebé kompletu.
Advertisement
Nia mós mehi atu bele iha buat ne’ebé sira iha, maibé limitasaun ne’ebé Yohan iha, la minimiza espíritu atu luta no hamorin Timor-Leste nia naran.
Semana ida-ne’e iha Dubai, dala ida tán Yohan hatudu katak, maski ho limitasaun ne’ebé iha, hamutuk ho ekipa, servisu fo liman no valór ba malu hodi bele luta no hetan rezultadu ne’ebé furak tebes.
Emiradu Árabe Unidu hato’o sira nia agradesimentu ba Federasaun Ski Timor-Leste ne’ebé bele organiza ona eventu ne’e iha Dubai no mós ajuda sira hala’o sira nia kompetisaun rasik.
Durante ne’e ema barak hatene de’it katak Dubai hanesan sidade boot ida ho prédios as hanesan Burj Khalifa. Maibé ho eventu ne’e, agora ema bele hatene katak, iha Dubai mós iha jelu no ski maski iha salaun laran.
“Ski Dubai orgullu tebes tanba bele parseria ho Dubai Sports Council and UAE Winter Sports Federation, atu bele hala’o kompetisaun ski internasionál ba dala uluk,” Mohammad El Etri, Vise Prezidente, Global Snow, Majid Al Futtaim Leisure, Entertainment & Cinemas dehan iha komunikadu.
Advertisement
Ida-ne’e hanesan rezultadu boot ida ba Global Snow tanba durante tinan lima (5) nia laran halo kampaña atu bele sai membru iha Federasaun Ski Internasionál.
Eventu ida ne’e importante tebes ba Global Snow atu bele atinji ambisaun hodi bele sai fatin desportu jelu globál ida iha dezertu no fó dalan ba Global Snow nia atletas sira atu bele reprezenta nasaun Dubai iha mundu internasionál.
Kompetisaun internasionál ski ne’ebé la’o durante semana ida nia laran, remata iha loron 20 Novembru ho susesu no hetan partisipasaun hosi nai ulun balun hosi uma na’in, Jordánia, Arabe Saudita inklui Honorário Counsul Geral Timor-Leste nian iha Beirut Yoseph Issa.
Durante kompetisaun ne’e, atleta sira esforsu hodi bele kualifika no reprezenta sira nia nasaun iha jogu Olimpico iha Beijing.
Advertisement
Maioria atleta sira ne’ebé partisipa iha kompetisaun ne’e mai hosi nasaun ne’ebé klasifika hanesan nasaun ki’ik tanba la iha jelu ou maski iha maibé kuantidade oitoan hanesan Timor-Leste, Xina Taip’e, India, Morócco, Ghana, Kyrgystan, Arábia Saudita, Jordánia no uma na’in Emiradu Árabe Unidu.
Dezáfiu ne’ebé rai ki’ik sira ne’e hetan mak oinsa atu harii federasaun ski ida, rekursu umanu, no mós fundu.
Maibé rai hirak ne’e estabelese rede ida no fahe koñesimentu ba malun hodi bele ajuda dezenvolve sira nia federasaun no atletas.
Atleta hosi rai ki’ik hirak ne’e, tenki hasai sira nia osan hodi bele treina iha nasaun sira ne’ebé iha jelu hanesan iha Europa hodi bele atinji sira nia mehi atu bele lori bandeira sira nia rai iha jogu Olimpico.
Mano, né hau Luís de Sousa Sequeira
Atu halo koresaun konaba notícia atleta ski Yohan nebe kualifika ba winter olympic.
Hau nia posição lá’os Presidente maibe Secretário Geral.
Luis de Sousa Sequeir
24/11/2021 at 2:59 PM
Mano, né hau Luís de Sousa Sequeira
Atu halo koresaun konaba notícia atleta ski Yohan nebe kualifika ba winter olympic.
Hau nia posição lá’os Presidente maibe Secretário Geral.
Obrigado
Luis
hatutan
24/11/2021 at 3:11 PM
Obrigado wain hato’o ona koreksaun. Ami sei hatutan ba editor sira hodi bele hadia. Dala idatan deskulpa ba inconveniência ne’e.