Hatutan.com, (26 Abríl 2024), Díli-Ekipa fiskalizasaun konjunta sei bá foti obrigatóriu veíkulu (karreta ho motór)  Estadu nian ne’ebé durante ne’e estasiona iha utilizadór sira-nia rezidénsia privadu.

Lee Mós: Infratór Utiliza Veíkulu Estadu iha Loron Feriadu, Na’in-tolu iha Indísiu Kríme Pekulatu bá Uzu

Ekipa konjunta halo pasa revista no konsege prende karreta no motór Estadu 30 ne’ebé mak kontinua sirkula iha loron feriadu, iha Díli. Foto/dok. Lazaro Pereira Quefi.

Ekipa fiskalizasaun konjunta, kompostu hosi Ministériu Finansas (MF) liuhosi Diresaun Jerál Jestaun Patrimóniu Estadu (DJJPE), Ministériu Transporte no Komunikasaun (MTK) liuhosi Diresaun Nasionál Transporte Terrestres (DNTT), Comissão da Função Públlica (CFP), Inspesaun Jerál Estadu (IGE), Comissão Anti Corrupção (CAC), Polísia Nasionál Timor-Leste (PNTL) liuhosi Departamentu Tránzitu.

Iha rezolusaun Governu númeru 130/2021  hatuur ona iha despaixu no sirkulár ministériu finansas katak, veíkulu Estadu hotu-hotu, konsidera ona hanesan veíkulu operasionál ne’ebé obrigatoriamente tenke halo estasionamentu iha garájen no kampaun ministériu no instituisaun  direta no indireta Estadu nian, hosi loron Segunda to’o sesta, inklui iha tempu fim de semana (sábadu no domingu).

Advertisement

Bazeia bá rezolusaun Governu ho  mós  sirkulár hosi MF nian  bandu ona funsionáriu sira no laiha direitu atu lori veíkulu sira Estadu nian  bá sira nia uma, bainhira laiha justifikasaun ruma atu halo servisu iha fim de semana ho natureza ida fins profisionál ninian.

Haktuir bá dekretu lei númeru 21/2021, determina ona subsídiu mensál transporte bá funsionáriu públiku hotu. Signifika, funsionáriu sira tantu hosi nivel kargu xefia ida boot liu iha nivel diretór jerál, to’o iha xefe departamentu no seksaun no funsionáriu baibain, laiha ona autorizasaun atu utiliza veíkulu Estadu bá iha asuntu sira la’ós tama bá iha karáter  servisu profiosionál nian.

Pontu fokál bá Ekipa fiskalizasaun konjunta, Euclides Vidal Madeira,  Sesta (26/04/2024), bá Hatutan.com hateten, atividade fiskalizasaun ida-ne’e sei la para tanba sira deside tiha ona atu halo aprovasaun bá kaledáriu operasaun ninian entre instituisaun sira ne’ebé mak envolve iha ekipa ne’e.

Xefe Unidade Informasaun no Seguransa CAC nian, Euclides Vidal Madeira. Foto/Rogério Pereira Cárceres

Bazeia ajenda ne’ebé mak iha, fiskalizasaun ne’e hala’o ho tipu oioin, mak hanesan, halo check point ka halo auto-stop iha estrada, halo vízita surpréza bá iha ministériu ho sekretáriu estadu sira, bainhira ekipa haree katak, iha nesesidade atu tun bá halo fiskalizasaun.

Ezemplu, ekipa fó prioridade bá ministériu sira ne’ebé maka ninia patrimóniu ne’e barak, hanesan, Ministériu Edukasaun (MD), Ministériu Agrikultura no Peskas (MAP), Ministériu Administrasaun Estatál (MAE),  nune’e, ekipa deside, dala-ruma tenke bá halo vizíta surpréza ida. Ida seluk maka tun direta bá utilizadór sira-nian uma, hodi rekolla veíkulu  sira Estadu nian ne’ebé iha sábadu ho domingu ka la’ós loron servisu nian lori bá estasiona iha sira nia uma privadu.

“Dadaun ne’e ami iha ona dadus ne’ebé maka natoon, no tempu badak ekipa sei tun bá terrenu para atu halo rekolla. Rekolla ita la’ós ona halo auto-stop iha estrada, mais, ita tenke bá utilizadór ida-idak ninia uma, haree fatin, para depois bele foti veíkulu  sira ne’e iha ida-idak ninia uma,”  Euclides Vidal Madeira hateten iha kna’ar fatin edifísiu CAC, Farol-Díli.

Advertisement

Euclides dehan, Governu deside atu atribui subsídiu transporte bá kargu diresaun xefia ida-idak, no deside kedas ona katak, hahú momentu ne’ebá , laiha ona karreta bá kargu funsionál, karreta hothotu ne’e fila bá iha oparasionál.

CAC Prosesa Funsionáriu Na’in-6

Xefe Unidade Informasaun no Seguransa CAC nian, Euclides Vidal Madeira, informa mós katak, karreta ho motór sira estadu nian ne’ebé molok ne’e ekipa rekolla, balu enkamiña bá Comissaun Função Pública (CFP) hodi aplika prosesu dixiplinár bá funsionáriu sira ne’ebé halo violasaun.

Utilizadór sira ne’ebé iha indikasaun bá Pekulatu Uzu nian, CAC rasik prosesa ona funsionáriu hamutuk na’in-neen (6), haree ninia grau violasaun ne’ebé maka utilizadór sira ne’e halo.

Jornalista: Rogério Pereira Cárceres

Advertisement