Hatutan.com, (28 Abríl 2024), Díli—Eleisaun órgaun  suku ne’ebé halao loron 27 fulan-Abríl 2024 iha Suku rua hanesan Madohi ho Bebounuk  Postu Admistrativu Dom Aleixo, Munisípiu Díli hakat bá segunda volta  tanba rezultadu eleisaun la prienxe  rekizitu 50%+1.

Lee Mós: Eleisaun Órgaun Suku 2024 iha Madohi La’o ho Hakmatek no Bebonuk Mosu Protestu

Kandidatu Xefe Suku Madohi na’in-rua; Bernadino de Cristo Ferreira ho Dedi da Costa prontu hakat bá eleisaun suku segunda volta iha 31 fulan-Maiu 2024. Foto/Leopoldina de Carvalho

Rezultadu eleisaun suku Madohi rasik hatudu kandidatu xefe suku na’in-rua  avansa bá segunda volta mak hanesan Bernadino de Cristo Ferreira ho totál votu 1592 no Dedi da Costa ho totál vótu 1022, ho nune’e lori konkorente na’ín-rua kontinua bá segunda ronde ne’ebe sei halao iha loron 13 fulan-Maiu, tinan ne’e.

Xefe suku atúal Bernadino de Cristo Ferreira hateten, manan ka lakon, prontu servisu hamutuk ho xefe suku eleitu no karik nia manan, kontinua hala’o servisu suku nian tuir kompeténsia rasik no apoiu jerasaun foun hodi promove sira iha kualkér eventu estadu nian.

“Karik ha’u mana katak kontinúa hetan konfíansa husi populasaun suku Madohi mak sei kontinua servisu maka’as tuir vizaun ne’ebe antes ne’e halo ona, kontinua halibur komunidade sira, promove joven sira hanesan rekursu bá suku Madohi,” nia tenik.

Kandidatu xefe suku ho númeru sorteiu  3 ne’ebé hakat mós ba eleisaun segunda volta, Dedi da Costa haktuir karik manan iha eleisaun suku, tinan ne’e, sei implementa nia programa ne’ebe halo ona.

“Ha’u iha planu programa hitu (7), maibé importante liu mak programa promove joven sira, no hametin estabilidade iha bairu hotu  ne’ebé pertense bá Suku Madohi,” Dedi da Costa. Hateten.

Total eleitór Suku Madohi 11.332, total votante bá eleisaun suku 5102, total votu 4895, votu Nulu 170 no Votu branku 37.

Enkuantu iha suku Bebonuk, Postu Admistrativu Dom Aleixo, Munisípiu Díli  mós tenke hakat bá segunda volta tanba votu ne’ebé kandidatu xefe suku sira hetan la liu bareira   50%+1.

Total eleitór iha  suku Bebonuk 6.943, votante hamutuk 3.247, votu válidu 3.117. nune’e,

Konkorente xefe suku Bebonuk mak hanesan  Alfredo da Costa ho total votu 1.226 no Serafin Macedo 768.

Jornalista : Leopoldina de Carvalho