Hatutan.com, (19 Abríl 2024), Díli— Prezidente Repúblika (PR), José Ramos-Horta preokupa bainhira haree iha televizaun membru FALINTIL Forsa Defeza Timor Leste (F-FDTL) mós tun bá terrenu hodi akompaña Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias ne’ebé halo eviksaun bá populasaun ne’ebé okupa rasi Estadu iha Díli.

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias. Foto: Elio dos Santos da Costa.

Preokupasaun ne’e tanba hanesan Xefe Estadu, Ramos-Horta la konkorda no ida-ne’e konsidera la’ós papél konstituisionál F-FDTL nian.

Lee Mós: Eviksaun Forsada La Refleta iha PEDN 2011-2030

Ramos-Horta dehan, Timor-Leste la’ós Afeganistaun ka Gaza no eviksaun ida-ne’e papél Polísia Nasionál Timor Leste nian atu apoia Governu ho reasaun ne’ebé iha edukasaun no sivilizadu la’ós bolu fali F-FDTL.

“Se ha’u mak Xefe Estadu Maiór Jenerál karik, ha’u rekuza, la fó órden atu bá mete iha situasaun sira ne’e,” Ramos-Horta hateten iha edifísiu INFORDEPE, Balide, Kinta (18/04/2024).

Kona-bá preokupasaun ne’e, iha 19 abril 2024, Hatutan.com halo konfirmasaun ho Sekretáriu Estadu Asuntu Toponímia no Organizasaun Urbana (SEATOU) Germano Santa Brites Dias hateten, involvimentu Polísia Militár nian iha ekipa konjunta ne’ebé lidera hosi SEATOU ne’e ho razaun fó seguransa bá ekipa.

“Hau-nia vida la fa’an iha loja, tanba bainhira ha’u tun bá terrenu hetan torturasaun, tuda, baku, ka ameasa ne’e ha’u-nia vida la tau iha risku, tanba vida la hetan iha loja,” Germano Santa Brites Dias  hateten hafoin halo limpeza no observa direta área Sengol, Sesta (19/04/2024).

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, halo eviksaun bá okupante rai Estadu iha merkadu Sengol Bidau,Díli, (18/04/2024) Foto: Tomé da Silva.

Germano Santa Brites Dias hateten, Prezidente Repúblika bele dada fali Políslia Militár hosi terrenu bainhira bele garante seguransa bá SEATOU ho ekipa.

“Ha’u hetan buat ruma hanesan kanek ka bainhira bá halo servisu mak hetan tuda ka kanek, Prezidente Repúblika bele rezolve ha’u-nia situasaun kanek, todan ka mate. Entaun, bele dada fali Polísia Militár ka polísia,” nia hateten.

Tuir nia, importante liu maka bele assegura ekipa halo servisu iha terrenu, ekipa la’o tuir dalan, ekipa hala’o servisu seidauk bá estraga ema nia sasan privada.

Nia esplika, pedidu bá hetan apoiu hosi Polisia Militár ne’e hosi Ministériu Admistrasaun Estatal  (MAE) mak hato’o tanba ekipa sempre hasoru risku bainhira ekipa halo greve bá jogu bola guling.

SEATOU esklarese tán katak, ho prezensa Polísia Militár nian durante ne’e seidauk estraga komunidade nia sasan ka halo krime ruma.

Kona-bá eviksaun iha Bidau Merkadu Sengol  nian, Governu halo kedan notifikasaun iha loron 6 fulan Outubru tinan kotuk,  no foin sobu iha semana ne’e.

“Tanba ne’e  povu Timor-Leste presiza koopera ho Governu, tanba Governu ida-idak mai ho nia planu no programa rasik atu hadi’a sidade Díli,” nia hateten.

Tuir Dekretu Lei númeru 33/2008 kona-bá espasu públiku hateten katak, ne’e rai ne’ebé pertense bá Estadu ne’e Governu mak tenki jere no hadi’a, hanesan hosi parte Bidau to’o Cristo Rei, inklui Bidau Santa Ana ne’ebé Governu sobu ona.

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, halo eviksaun bá okupante rai Estadu iha merkadu Sengol Bidau,Díli, (18/04/2024) Foto: Tomé da Silva.

Nia husu bá populasaun sira mós presiza iha konsiénsia katak, bainhira uza ona rai Estadu hodi halo negósiu, maibé tenki apoia dezenvolvimentu bainhira Governu iha planu ruma ba rai ne’e.

Germano Santa Brítes Dias hateten tán, nia parte simu informasaun katak, Prezidente Repúblika iha hanoin atu prossesa problema sobu komunidade nia uma iha bairru Aitarak-laran, nune’e nia parte sei la pronunsia li-afuan ruma hasoru Xefe Estadu maibé sei hakruk ba desizaun ne’e.

“Bá ha’u membru kiikoan, Sekretáriu Estadu laiha kbiit no kompeténsia atu ko’alia hasoru Prezidente Repúblika José Ramos-Horta,” Germano dehan tán.

Liga ho informasaun dehan Prezidente Repúblika sei manda karta bá Primeiru Ministru hodi retira hosi SEATOU nia dehan, desizaun hotu-hotu iha Primeiru Ministru nia liman.

“Ba ha’u, ha’u sei la tanis bá kargu se ha’u nia nai ulun Primeiru Ministru dehan ha’u sai, ha’u haloot ha’u nia kadernu no lapizeira fila bá uma. Ha’u nia vida mai hosi agrikultór no sofer ne’ebé bá ha’u buat baibain,” nia hateten.

Jornalista: Vito Salvadór/Leopoldina de Carvalho