Hatutan.com, (17 Novembru 2021), Díli-Atleta Ski Timor-Leste, Yohan Goutt Gonçalves, sei  partisipa iha kurida ski internasionál ne’ebé sei hala’o iha kapitál Emiradu Árabe Unidu, Dubai.

Atleta Ski Timor-Leste, Yohan Goutt Gonçalves. Foto/Espesiál

Kompetisaun ne’ebé  hala’o durante loron rua;  kuarta-kinta (17-18/11/2021), partisipa husi atleta nasaun 18 no atleta Yohan Goutt Gonçalves, kompete iha kurida refere no garante sei rekolla vitória iha eventu ne’e

“Kompetisaun ne’e hanesan mehi boot ida, no sai hanesan esperiénsia furak iha atu bele mai Dubai no halo kurida hamutuk ho atleta seluk. Espera  ha’u bele hetan pontu ne’ebé ha’u presiza atinje atu bele lori bandeira Timor-Leste iha jogu olímpiku,”  atleta Yohan Goutt Gonçalves hateten liuhosi komunikadu imprensa ne’ebé Hatutan.com simu hosi Sekretariadu Sky Timor-Leste.

Hafoin kompetisaun ne’e, atleta ski Timor-Leste, Yohan Goutt Gonçalves mós hetan konvite husi Federasaun Ski Emiradu Árabe Unidu atu bele partisipa iha kampionatu lokal kurida Ski Emirados Arabes Unidos ne’ebé sei halao iha Sesta-Sábadu  (19-20/11/2021).

“Federasaun Ski Timor-Leste hamutuk ho ita nia atleta sente orgullu tebes no hakarak anúnsiu katak Timor-Leste sei halo istória foun hanesan primeiru nasaun iha mundu ne’ebé hala’o eventu kurida Federation International of Ski (FIS) alpine iha Dubai,” sita komunikadu ne’e.

Kompetisaun kurida ski internasionál iha Dubai sai mós nu’udar sasukat ida atu atleta Timor Oan Yohan Goutt Gonçalves bele halo esforsu hodi ultrapasa ba iha jogu olímpiku game. Nune’e, atleta TL Yohan Goutt Gonçalves presiza tan pontu  haat (4) hodi bele kualifika ba jogu olímpiku.

Iha kompetisaun ne’e, Yohan Goutt Gonçalves mai hamutuk ho ekipa lojístika no treinadór husi Paris no mós hetan partisipasaun husi Sekretáriu Jerál Federasaun Ski  Timor-Leste, Luis de Sousa Sequeira.

Eventu kurida ski internasionál ne’e  partisipa husi atleta hamutuk 28 husi nasaun 18 inkluindu husi Emiradu Árabe Unidus, Portugal, Xina Taipe, Ghana, Bosnia, Morocco, Albania no seluk tan.

Durante loron rua nia laran atleta hirak ne’e sei luta atu bele hetan pontu másimu hodi bele kualifika ba jogu olímpiku malirin ne’ebé sei hala’o iha Beijing, Xina husi loron 4 to’o loron 20 fulan-Fevereiru 2022.

Jornalista : Vito Salvadór