OJE 𝟐𝟎𝟐𝟐 𝐛𝐚 𝐌F $𝟐𝟗.𝟖𝟔𝟗.𝟐𝟖𝟗 𝐀𝐩𝐫𝐨𝐯𝐚𝐝𝐮 𝐢𝐡𝐚 𝐄𝐬𝐩𝐞𝐬𝐢𝐚𝐥𝐢𝐝𝐚𝐝𝐞

Hatutan.com, (07 Dezembru 2021), Díli–Parlamentu Nasionál liuhosi sesaun plenária, Tersa (07/12/2021), aprova ona iha espesialidade proposta Orsamentu Jerál Estadu (OJE) 2022 ba Ministériu Finansas ho montante totál $29.869.289.

Notísia iha Relasaun: Bankada Governu La Admite Proposta Alterasaun Orsamentál husi CNRT

Parlamentu Nasionál liuhusi diskusaun OJE 2022 iha epesialidade aprova ona Orsamentu ba MF, Tersa (07/12/2021). Foto/Mídia PN

Liuhusi diskusaun no votasaun iha espesialidade ne’e, membru Parlamentu Nasionál aprova ho votu afavór 45, abstensaun 17 no kontra 0 (zero). Ho nune’e, OJE ba MF ho montante totál $29.869.289sei aloka ba kategoria:  Saláriu no Vensimentu ($4.019.189, Bens no Servisu ($20.022.443), Kapitál Menór ($5.000.000), Kapitál Dezenvolvimentu ($827,657) no  Transferénsia Públiku 0 (zero).

Orsamentu ne’e atu finansia programa prioridade  rua  MF nian iha 2022, maka hanesan Jestaun Finansas Públikas ho totál orsamentu alokadu $19.078.937, ho Boa Governasaun no Jestaun Institusionál $10.790.352.

Tuir observasaun Hatutan.com nian iha sesaun diskusaun no aprovasaun espesialidade ba OJE 2022 MF nian ne’e prezide direta hosi Prezidente Parlamentu Nasionál, Aniceto Longuinhos Guterres Lopes, akompaña husi membru Bankada Parlamentár sira iha Parlamentu Nasionál no prezensa husi Primeiru-Ministru, Taur Matan Ruak, Ministru Finansas, Rui A. Gomes no membru Oitavu Governu Konstitusionál.

Jornalista: Regério Cárceres