Uza Alkati Baku Oan To’o Grave, Maria Kondenada ho Pena Suspensaun Tinan Tolu

Hatutan.com (25 Janeiru 2022) Díli—Tribunál Distritál Díli, liu hosi leitura sentensa ne’ebé lee hosi juiz prezide Alvaro Maria Freitas, José Gonçalves, Argentino Nunes, kondena arguida Maria Madalena de Fátima ho pena prizaun tinan tolu suspende tinan tolu ba krime krime maus tratus.

Tribunál Distritál Díli. Foto/Hatutan.com.

Krime Maus Tratus ne’e involve arguida Maria Madalena de Fátima tanba hodi tudik no alkati baku nia oan hakiak, lezada Talita Fátima Thilraj ne’ebé ho idade 13 to’o grave.

Notisia iha Relasaun:Uza Tudik-Alkati Hanorin Subriña, MP Akuza Arguida ho Krime Maus Tratus

Razaun Tribunál aplika pena suspensaun ne’e, tanba haree ba sirkuntánsia hotu, liu-liu ba arrependimentu arguida nian no konviksaun durante julgamentu.

Alende ne’e, Tribunál mós konsidera arguida hanesan faluk ne’ebé tenki servisu makás hodi tau-matan ba nia oan na’in-tolu no arguida rasik hakarak husu deskulpa ba lezada, maibé lezada mak lakohi, tanba laran sei moras ba arguida nia hahalok.

Maske faktus iha akuzasaun provadu hotu, katak arguida utiliza ai, alkati, tudik hodi baku lezada no tuir relatóriu médiku katak lezada hetan fitar foun no tuan iha isin lolon tomak hanesan kotuk laran, kelen, kabun, ain no liman.

Tribunál mós esplika ba arguida katak, arguida la presija ba prizaun, maibé iha uma hodi tau-matan ba oan sira, maibé durante tinan tolu labele komete kualkér aktu krime, bainhira komete maka arguida tenki ba prizaun tinan tolu.

Antes ne’e, lezada hela iha uma mahon iha Viqueque no daudaun lezada hela ho viziñuu de’it hodi ba eskola.

Hafoin rona arguida no lezada iha Tersa 25 fulan ne’e,  Tribunal adi’a hikas julgamentu ba loron seluk hodi kontinua iha alegasaun.

Antes ne’e, tuir akuzasaun ne’ebé iha katak, iha tinan 2019, tuku 22:00 otl, iha arguida nia uma aldeia Au-hun, Suku Becora, arguida lori aí hodi baku dala ida iha lezada nia liman parte loos, kontinua foti tudik no lori baku iha lezada nia liman karuk, hafoin ne’e arguida foti alkati hodi habit dala tolu iha lezada nia kelen loos rezulta kanek no ran.

Ho hahalok arguida nian, Ministériu Públiku akuza arguida ba prátika krime maus tratus ne’ebé previstu iha artigu 155 hosi kódigu penál Timor-Leste.

Audiénsia julgamentu prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Jacinto Babo no arguida hetan asisténsia legál hosi Defensór Públiku Manuel Exposto.

Jornalista: Carmelita Isaac