CNE Keixa Ona ba Polísia Kona-bá Insidente iha Kampaña

Hatutan.com, (07 Marsu 2022), Díli—Comissão Nacionál ba Eleição (CNE) submete ona keixa ba Polísia Nasionál Timor Leste (PNTL), hodi hala’o prosesu investigasaun ba insidenti ne’ebé akontese durante kampaña eleisaun prezidensiál.

Konfrontu entre apoiante balun ba kandidatu Prezidente Repúblika iha Baucau, Domingu (03/07/2022). Foto/Facebook.

Keixa ne’ebé CNE rejista mak hanesan involvimentu labarik iha kampaña maski ho razaun oi-oin, segundu insidente ne’ebé akontese iha loron 04 fulan ne’e, iha Munisípiu Viqueque, Makadiki bainhira apoiantes fila hodi rezulta ema na’in rua kanek, terseiru iha munisipiu Baucau ne’ebé tuir loloos loron kampaña ba kandidata ho númeru sorteiu 9 Armanda Berta dos Santos, maibé depois de fila hosi Lautém atu ba Baucau iha apoiantes hosi kandidatu balun interrompe.

Notisia iha Relasaun:Kalendáriu Eleitorál ba Eleisaun Prezidente Repúblika 2022

“Hosi insidente hirak ne’e, Polisia atua kedan no investigasaun la’o ona hodi hatene motive loloos. Maibé, seidauk bele dehan se mak suspeitu tanba iha asaun no asaun, nune’e ita hein prosesu investigasaun,” Prezidente CNE, José C. Belo Perreira liu hosi konferénsia imprensa iha salaun CNE Segunda (07/03/2022).

CNE mós hetan ona informasaun kona-bá militante partidu FRETELIN nian iha Munisípiu Manufahi ne’ebé halo impedimentu ba kampaña hosi kandidatura José Ramos Horta, maibé to’o agora seidauk iha keixa.

Parte CNE halo ona kontaktu Diretór CNE Munisipiu Manufahi inklui Komandu Polísia munisipál hodi kontinua fó seguransa no atuasaun, tanba laiha grupu ka sidadaun ida mak hapara fali ema seluk nia kampaña.

“Iha mós sansaun legál liu hosi dalan justisa maka regulamentu ne’ebé iha, maibé iha mós sansaun sosiál ne’ebé karik sei fó influensia ba eleitór sira bainhira atu vota,” José Belo hateten.

Tuir observasaun CNE katak, kandidatu sira kontinua la respeita kalendáriu kampaña ne’ebé iha, hodi kontinua organiza mini kampaña no kontinua uza linguazen provokativu.

Tanba ne’e, CNE apela ba kandidatu sira atu kontinua promove linguazen konvensionál iha kampaña liu-liu kona-bá papél no programa ne’ebé bele konvense eleitór no kontinua respeita kalendáriu ne’ebé iha.

Jornalista: Carmelita Isaac