Kontajen Finál, Ramos-Horta Kontinua Lidera ho Votu 301,481

Hatutan.com, (21 Marsu 2022), Dili-Hafoin kontajen durante loron-tolu, hahú husi Sábadu to’o Segunda kalan (19-21/03/2022), tuku 21:10 Otl, Secretariado Técnico de Administração Eleitoral (STAE) konsege finaliza akta sira hosi munisípiu 12 inklui Rejiaun Administrativu Espesiál Oé-Cusse Ambeno (RAEOA). Husi kontajen ikus (finál) ne’e, hatudu, Kandidatu Prezidente Repúblika ho númeru sorteiru 14, José Manuel Ramos-Horta,  kontinua lidera ho votu 301,481 (46.58%).

Notísia iha Relasaun: CNE Sei Verifika Akta Orijinál, Ramos-Horta Lidera Provizória ho Votu 278.138

Kandidatu PR ho númeru sorteiu 14, José Manul Ramos-Horta. Foto/Fonese husi Eújenio Pereira

Hafoin rezultadu kontajen iha STAE remata, sei haruka ba iha Komisaun Nasionál ba Eleisaun nian (CNE) atu halo apuramentu no verifikasaun ba votu nulu no reklamasaun sira, molok halo apuramentu finál no haruka ba Tribunál Rekursu (TR) hodi halo validasaun no anúnsiu rezultadu finál.

Hosi númeru eleitór ne’ebé rejista hosi STAE, iha eleitór hamutuk 195.507 (22,74%), mak la partisipa iha votasaun, hodi fó sira nia votu. Hosi totál akta sira ne’ebé nia prosesu kontajen remata, kandidatu hosi partidu FRETILIN, Francisco Guterres Lú-Olo, hetan votu 143.408 (22,16%), Armanda Berta dos Santos 56,289 (8,70 %), Lere Anan Timur 48,959 (7,57%), Mariano Assanami Sabino 47,008 (7,26%), Anacleto Ferreira 13,059 (%2,02), Martinho Gusmão 8.485 (1,31%), Hermes da Rosa Correia Barros 7,958 (1,23%), Milena Pires 5,335 (0,82%), Isabel Ferreira 4,165 (0,64%), Felisberto Araujo Duarte 2,615 (0,40%), Constâncio Pinto 2,474 (0,38%), Rogério Lobato 2,028 (0,31%), Virgílio Guterres 1,685 (0,26%), Antero Bendito 1,531 (0,24%) no Ângela Freitas 692 (0,11%).

Jornalista: Vito Salvadór/Rogério Cárceres