MTK Investiga Hela Asidente Ró Berlin-Ramelau

Hatutan.com, (25 Abríl 2022), Díli– Ministériu Transporte no Komunikasaun (MTK), daudaun ne’e, halo hela investigasaun bá insidente husi Ró Berlin-Ramelau ne’ebé soke Portu  Iwao Kitahara Mahata, Oé-Cusse, Domingu (17/04/2022).

Lee Mós : Durante Operasaun, Ró Berlin Ramelau “Xoke” Dala-rua

Ró Berlin-Ramelau. Foto/Espesiál

Asidente ne’e akontese bainhira ró Berlin-Ramelau transporta Atoni-oan sira atu bá partisipa iha eleisaun prezidensiál segunda volta, 19 Abríl 2022 liubá.

Asidente ne’e rezulta ró nia lolon balun fitar no balun naklees no tenke presiza osan atu bele hadi’a no halo manutensaun.  

“Asuntu id- ne’e, agora iha hela investigasaun. Karik akontesimentu ne’e ninia kauza saida, human error ka forsa natureza nian. Ita hotu hein rezultadu investigasaun,” Ministru Transporte no Komunikasaun (MTK), José Agostinho da Silva, informa bá jornalista sira hafoin hasoru-malu ho Primeiru-Ministru (PM), Taur Matan Ruak iha Rezidénsia Estadu Primeiru-Ministru nian iha Faról, Díli, Segunda (25/04/2022).

Nia informa katak tékniku sira ne’ebé Governu kontrata haree no identifika hela ró nia kondisaun no kona-bá  ró nia lolon balun fitar to’o naklees haree ona oinsá maka solda ho kualidade atu bele asegura nafatin nia konektividade.

Ró Berlin-Ramelau nia lolon nakles. Foto/Espesiál

Tuir informasaun katak kondisaun ró nian, kuak-rua iha parte sorin liman karuk nian, hafoin kose iha parajen portu nian.

Tuir informasaun hosi APORTIL sira katak, laloran no anin-boot maka rezulta ró atraka ladi’ak. Nune’e kose bá fatin parajen. Maibé, informasaun hosi pasajeiru balun fali haktuir katak, tripulante sira ró kondús ho velosidade no hakfodak maka soke iha parajen.

Asidente ró Berlin-Ramelau ne’e ba dala-rua ona, iha ne’ebé asidente dahuluk akontese iha loron 23 fulan-Dezembru 2021 soke Portu Iwao Kitahara Mahata, Oé-Cusse hafoin hand over (entrega) iha loron 20 fulan-Dezembru 2021.

 Jornalista: Rogério Pereira Cárceres