Nasionál
PM Taur Husu Traballadór 87 Hatudu Komportamentu Di’ak iha Koreia
Hatutan.com, (06 Maiu 2022), Díli—Primeiru-Ministru (PM) Taur Matan Ruak, husu ba traballadór timoroan na’in 87 inklui feto na’in 2 ne’ebé iha samana ne’e sei arranka ba serbisu iha Koreia du súl hodi hatudu komportamentu di’ak, no dezeza susesu.
Primeiru-Ministru (PM) hala’o despedida ba traballadór na’in 87 atu ba serbisu iha Koreia, iha Timor Lodge, Komoro, Sesta (06/05/2022). Foto/Média GPM.
Primeiru-Ministru (PM) husu ne’e, bainhira hamutuk ho Sekretáriu Estadu Formasaun Profisionál, Alarico do Rosário, Embaixadór Koreia mai Timor-Leste, Kim Jeong Ho, hala’o despedida ba traballadór sira iha Timor Lodge, Komoro, Sesta (06/05/2022).
Lee Mós:Deskonfia SEFOPE-Kandidatu Traballadór Sai Vítima ba Kobransa Ilegál
Xefe Governu apela ba traballadór sira atu buka adapta an ho kultura lokál no importante liu disiplina hodi manán esperiénsia.
“Ha’u-nia oan joven sira ba hetan rai foun, ema foun hahalok foun, hahán foun, lisan foun situasaun foun, ne’e mudansa ida boot. Maibé ita-boot sira nia kolega barak dezde 2009 ba iha ne’ebá to’o agora sira hatudu katak sira bele adapta an ba mudansa ne’e. Ema dehan, la’ós ida ne’ebé forte liu no ida ne’ebé matenek liu mak nia bele ba. Maibé, oinsa sira ne’ebé hatene adapta an tuir ambiente, ida ne’e mak ba oin sei moris, ita boot sira hahú ida ne’e,” Hatutan.com sita lia menon Taur Matan Ruak iha komunikadu.
Taur Matan Ruak mós agradese ba inan-aman traballadór sira nian ne’ebé bele hosik sira nia oan hakat tasi ba serbisu iha rai seluk, ne’ebé sei ajuda família nia ekonomia uma laran, hodi hatutan traballadór sira ne’e hanesan mós erói ba Timor-Leste tanba sira kontribui ba dezenvolvimentu nasionál liuhosi haruka osan ba família no kontribui ba taxa nasaun nian.
Husu mós ba inan aman traballadór sira nian, bainhira oan sira haruka osan mai, uza ho di’ak, rai didi’ak investe fali ba nia alin sira nia edukasaun ba sustentabilidade família nian iha futuru.
Ikus liu, Xefe Governu agradese ba Governu Koreia, espesiál ba Embaixadór Koreia no nia ekipa ne’ebé trata traballadór Timoroan sira hodi ba serbisu iha Koreia.
Dezde 2019 to’o ohin loron, liuhosi kooperasaun Governu País rua ne’e nian, haruka ona traballadór na’in 4.444 ba Koreia no ba tinan 2022, hosi Janeiru to’o Maiu hamutuk 567, inklui sira na’in 87 ne’ebé ohin ba halo serimónia despedida.
Jornalista: Rogério Pereira Cárceres