Prezidente Repúblika Promulga OJE Retifikativu 2022

Hatutan.com, (18 Maiu 2022), Díli—Prezidente Repúblika (PR) Francisco Guterres Lú Olo, promulga  Dekretu Parlamentu Nasionál Lei númeru 62/V-alterasaun dahuluk ba Lei númeru 1/2022, 3 janeiru kona-bá Orsamentu Jerál Estadu (OJE) ba 2022 no kriasaun Fundu Kombatentes Libertasaun Nasionál.

Prezidente Repúblika, Francisco Guterres Lú Olo. Foto/Média PR.

“Orsamentu Jerál Estadu ba tinan-2022 aprovadu ho Lei númeru/2022, 3 janeiru. Maibé haree ba situasaun ekonómika internasionál no aumentu substansiál tasa inflasaun nian, sai nesesáriu ba Estadu foti medidas hamenus impaktu ekonómiku, hodi antisipa liuhosi dotasaun orsamentál atu finansia sasukat sira,” Hatutan.com sita komunikadu hosi Palásiu Prezidensiál Nicolau Lobato, Kuarta (18/05/2022).

Lee Mós: OJE Retifikativu 2022 Pasa Iha Finál Globál ho Votus 36

Reseitas konsolidadas hosi Setór Públiku Administrativu hahú sa’e ba $3,100, 688,695. Despeza órgaun servisus no Administrasaun Sentrál sa’e ba $3,100,688,695.

Orsamentu Jerál Estadu Retifikativu ba tinan-2022 fahe tuir klasifikasaun ekonómika hanesan tuirmai ne’e: $250.537.130 ba Saláriu no Vensimentu, $467.077.382 ba  Bens e Servisu, $1.950.982.687 ba Transferénsia Públika, $41.914.097 ba Kapitál Menór no $390.177.399 ba Kapitál Dezenvolvimentu.

Bazeia Lei ne’e, durante tinan-2022, Governu autorizadu bele foti transferénsia husi Fundu Petrolíferu to’o montante $2.552.598.015.

Lei ne’e harii Fundu ba Kombatentes Libertasaun Nasionál ho finalidade finansia programa apoiu ba Kombatentes Libertasaun Nasionál iha área sosial, edukasaun, saúde, empregu, asesu ba kréditu no atividade ne’ebé manán rendimentu.

Lei Orsamentu Jerál Estadu Retifikativu ba tinan-2022 aprova iha Parlamentu Nasionál iha 11 maiu 2022.

Jornalista: Rogério Pereira Cárceres