Inisiativa Fiskalizasaun Abstrata Bá OR La Afeta Ezekusaun

Hatutan.com, (26 Maiu 2022), Díli-Primeiru Ministru (PM), Taur Matan Ruak, hateten inisiativa Prezidente Repúblika (PR) José Manuel Ramos-Horta nian ne’ebé haruka Tribunál Konta, atu halo fiskalizasaun abstrata ba Orsamentu Retifikativu (OR) sei la afeta bá prosesu sira ezekusaun nian hosi Governu.

Lee Mós : Prezidente Repúblika Promulga OJE Retifikativu 2022

PM Taur Matan Ruak enkontru ho PR José Ramos-Horta, Kinta (26/05/2022). Foto/Mídia GPR

“La afeta ida. Alias, pelu kontráriu, ne’e prerrogativa ida ne’ebé mak konstituisaun fó, katak, Prezidente  Repúblika bele uza ida-ne’e,” Primeiru Ministru (PM), Taur Matan Ruak, hateten ba jornalista sira, hafoin enkontru semanál ho PR Ramos-Horta iha Palásiu Prezidénsia, Díli, Kinta (26/05/2022).

PM Taur dehan, atividade fiskalizasaun bá OR ho montante billaun $1.1 ne’e la’ós foin mak halo hosi PR Ramos-Horta, maibé, dezde ninia tempu, bainhira sei Prezidente Repúblika, nia haruka beibeik ba tribunál halo fiskalizasaun.

“Ita-boot sira hatene, foin daudauk, iha fulan-Maiu ne’e mak Prezidente Repúblika sesante foin promulga, entaun, iha tempu ida preparativus para depois bá ezekusaun. Ezekusaun laiha problema,” PM Taur hateten tán.

Durante enkontru semanál no enkontru bá dahuluk ho PR José Manuel Ramos-Horta ne’e, Primeiru-Ministru Taur informa kona-bá preparasaun sira Governu nian atu lori planu bá aprezenta no diskute iha Parlamentu Nasionál.

Iha tinan sira liubá, bainhira iha formasaun bá Governu foun, Governu sempre lori buat rua de’it bá aprezenta iha PN. Ida mak programa no ida seluk maka orsamentu anuál nian iha Orsamentu Jerál Estadu.

Durante sorumutuk ne’e, PR Ramos-Horta, informa mós kona-bá ninia prioridade sira bá PM Taur, katak,  oinsá, kombate ma-nutrisaun, no mós hamlaha TL.

“Governu halo esforsu para informa daudaun atividade sira ne’ebé ami halo hela, mais Governu mós kontinua nafatin sira-nia servisu ho GPR para bele halo nusá maka akomoda ideia sira-ne’e. Mas antes, ami nia membru Governu balu, sei mai para nune’e informa situasaun sira bá PR no prepara orsamentu 2023 nian,” PM Taur afirma tán.

Jornalista: Rogério Pereira Cárceres