Hatutan.com (27 Maiu 2022), Díli—Tribunál Distritál Díli (TDD) iha Sesta 27 fulan ne’e, hala’o audisaun hodi bolu hikas kondenadu Afonso Orleans no Agostinho Marçal, tanba la kumpri desizaun TDD, hodi selu Kooperativa Moris Rasik nia osan ho montante $10.000-resin, relasiona ho krime abuzu de konfiansa agravadu ne’ebé previstu iha artigu 257, tanba privatiza osan Kooperativa Moris Rasik.
Antes ne’e, desizaun TDD iha loron 29 fulan Outubru tinan 2019, kondena Afonso Orleans ho pena prizaun tinan rua fulan ualu, maibe suspende ba tinan tolu signifika arguidu la ba prizaun maibé ho kondisaun katak tenki selu fali Kooperativa Moris Rasik nia osan ho montante $3.940 ho durasaun tempu fulan neen.
Ba Agostinho Marçal, TDD kondena ho pena prizaun tinan rua fulan sia, maibé suspende ba tinan tolu maibé ho kondisaun tenki selu fali Moris Rasik nia osan ho valor $7.300-resin ho durasaun tempu tinan ida.
Depois de desizaun sai, kondenadu sira la kumpri hodi la selu hotu Kooperativa Moris Rasik nia osan durante períudu ne’ebé TDD fó ona liu hosi desizaun TDD nian.
Tanba ne’e, iha audiénsia Afonso Orleans deklara nia prontu atu kumpri desizaun ne’ebé antes ne’e Tribunál hasai ona ho prestasaun primeiru ho montante $.1000 kada fulan ne’ebé sei entrega ba TDD iha loron 30 fulan ne’e ho nia prazu to’o fulan Novembru.
Agostinho Marçal mós prontu atu devolve hikas Kooperativa Moris Rasik nia osan ho montante $7.300-resin durante tinan ida bazeia ba desizaun Tribunál no bainhira la kumpri maka prontu ba prizaun.
Audiénsia julgamentu ne’e, prezide husi juiz singulár Argentino Nunes, MP reprezenta hosi Prokuradór Simão de Brito no arguidu sira hetan asisténsia hosi Defensór Públiku Juvinál Dias.
Jornalista: Carmelita Isaac
