Karteira Profisionál Hanesan Identidade Hodi Hetan Konfiansa Públiku

Hatutan.com (14 Juñu 22) Díli—Konsellu Imprensa (CI) konsidera karteira professionál hanesan identidade jornalista nian hodi hetan konfiansa públiku, eleitór no telespetadores ba produtu ne’ebé jornalista halo liu hosi notísia, fotografia no seluk tán.

Prezidenti CI, Virgílio da Silva Guterres atribui kartaun Karteira Profisionál ba jornalista na’in-ualu iha Otél Audian, Tersa (14/06/2022). Foto/CI.

“Sai profisional la’ós iha momentu hakerek notísia ka halo entrevista, maibé maneira hakerek ho profisionál tanba integridade la’ós iha kartaun. Maib’e, maneira ko’alia, intervensaun iha públiku bele refleta profisionalizmu jornalista, katak publikasaun sala ka loos, tanba jornalista iha kapasidade atu hato’o informasaun loloos ba sosiadade. Tanba ne’e, karteira profissionál ne’e la’ós de’it instrumentu profisionál atu hatene buat hotu-hotu. Maibé, hanesan Identidade bainhira buka informasaun liu-liu konfiansa publiku,” Prezidenti CI, Virgílio da Silva Guterres hateten iha ámbitu atribuisaun karteira profissionál ba jornalista na’in-ualu iha Otél Audian, Tersa (14/06/2022).

Lee Mós: Durante Kampaña ElPer, CI Identifika Mídia no Jornalista Balun Komete Infrasaun Étika

Situasaun ne’ebé dalabarak profissionál sira hasoru hodi lori sira ba situasaun dilemátika maka primeiru interese públiku no segundu interese kompañia, maibé sempre iha opsaun profisionál katak tenki hakruuk ba públiku nia interese.

Prezidente CI ne’e espera katak ho karteira profissionál ne’ebé atribui ona bele hametin liu tán papél jornalista hanesan Roman ba Sosiedade.

Jornalista ne’ebé simu karteira profisionál ne’e hamutuk na’in-ualu kompostu hosi feto na’in-ha’at no mane na’in-ha’at ne’ebé tuir ona formasaun durante fulan sia nia laran.

Haktuir iha lei komunikasaun sosiál artigu 14 ko’alia kona-bá asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.

Iha artigu 13, lei komunikasaun sosiál haktuir kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Konsellu Imprensa mak fó no renova.

To’o ohin loron, Conselho de Imprensa atribui ona kartaun karteira profesionál ba jornalista hamutuk na’in 341.

Jornalista: Carmelita Isaac