Defeza & Seguransa
PNTL Bobonaro Halo Apreensaun ba Viatura 20 Viola Kódigu Estrada
Hatutan.com, (14 Jullu 2022), Díli—Ekipa konjunta Komandu Polísia Nasionál Timor Leste (PNTL) Munisípiu Bobonaro, hala’o pasa revista iha dalan públiku no konsege halo apreensaun ba motorista sira hamtuk 20 ne’ebé viola kódigu estrada.
PNTL Maliana hala’o pasa revista ba karreta no motorizada sira iha área Lahomea, Kinta (14/07/2022). Foto/PNTL.
Pasa revista ne’e atu halo kontrolu ba sasan kontra bandu sira, liuliu haree mós kona-bá transporte sira nia dokumentu liga ho kódigu Estrada.
Lee Mós: Ekipa Konjunta Halo Apreensaun ba Patrimóniu Estadu 10 Iha Díli
“Ohin dader ita hala’o pasa revista ba karreta no motorizada sira iha área Lahomea-Maliana no halo aprensaun ba karreta Angguna rua, bus lima, kamioneta rua no motorizada 11. Nune’e, apreensaun ba viatura hamutuk 20,” Hatutan.com sita deklarasaun Komandante PNTL Munisípiu Bobonaro, Superintendente Polísia, Antonino Mauluta iha komunikadu.
Ekipa konjunta prende viatura hirak-ne’e tanba motorista sira komete infrasaun hanesan, la uza asesores viaturas hanesan espellu no xapa matrikula, dokumentu no karta kondusaun liu prazu no barak liu laiha karta kondusaun.
“Ekipa operasaun pasa kedan koima ba infratór sira no evakua ona evidénsia sira ne’e mai iha tránzitu Komandu PNTL Munisipiu Bobonaro, kontinua submete ba prosesu hafoin sira selu tiha iha Banku maka mai foti fali sira evidénsia sira ne’ebé prende,” esplika.
Operasaun konjunta ne’e hetan apoiu hosi Seksaun Tránzitu Rodoviária na’in-lima, membru Seksaun Operasaun na’in-ida, membru Seksaun Justisa na’in-ida, membru Seksaun Administrasaun na’in-ida, membru SIP na’in-ida no membru Polisia Komunitária na’in-ida.
Jornalista: Rogério Pereira Cárceres