Ramos-Horta Husu Governu Tau Matan Espesiál Bá PNTL ho F-FDTL

Hatutan.com, (12 Agostu 2022), Díli-  Prezidente Repúblika (PR), José Ramos-Horta husu bá Governu atu tau matan espesiál bá Polísia Nasionál Timor-Leste (PNTL) ho FALINTIL-Forsa Defeza Timor Leste (F-FDTL) atu instituisaun rua-ne’e bele halo mós atividade sosiál, sívika no desportiva barak liután iha komunidade.

Lee Mós : Taur Fó Orden Kansela Rekrutamentu Membru Foun PNTL

PR Ramos-Horta vizita Kuartél Jerál PNTL, Sesta (12/08/2022). Foto/Hatutan.com

Prezidente Repúblika (PR), José Ramos-Horta bainhira hala’o vizita bá Kuartél Jerál PNTL, Sesta (12/08/2022),  hateten kompara karik PNTL sira tinan lubuk ida bá kotuk no agora hatudu progresu barak tebe-tebes iha kualidade profisionalizmu iha seguransa, maski  ekipamentu la sufisiente.

Prezensa PR Ramos-Horta nian iha Kuartél Jerál PNTL simu hosu Vise Ministru Interiór António Armindo ho Komandante Jerál PNTL, Komisáriu  Faustino da Costa ho nia adjuntu no dirijente komandu PNTL nian balun tan.

Ramos-Horta afirma Governu tenke tau matan liubá instituisaun PNTL ho FALINTIL-Forsa Defeza Timor Leste (F-FDTL) hodi fó orsamentu espesiál bá sira atu instituisaun rua ne’e bele halo mós atividade sosiál, sivika no desportiva barak liután.

 “Ho situasaun hakmatek ne’e forsa seguransa sira iha posibilidade ajuda komunidade sira, no fó biban bá sira ho meius tomak iha área enjeñaria ka ekipamentu seluk hodi ajuda komunidade sira bainhira ema ruma ka família balun presiza derrepente hadi’a uma ka eskola ruma ne’ebé anin sobu ka bele mós organiza atividade sosiál, kulturál ho populasaun sira ka mobiliza joven sira kuda ai,” José Ramos-Horta hateten.

PNTL no F-FDTL bele halo atividade sira ne’e atu tulun komunidade sira, tan ne’e governu haree took programa espesiál iha forsa rua ninia liman no di’ak liután se forsa rua ne’e koordena tanba F-FDTL iha unidade enjeñaria ida ne’ebé mezmu ki’ik maibé di’ak no PNTL rasik mós iha unidade enjeñaria mezmu ki’ik ho ekipamentu mínimu sira mós iha kada instituisaun iha unidade médiku hodi bele mós prestasaun servisu iha aldeia hodi fó tratamentu saúde bá komunidade.

Xefe Estadu hatutan iha instituisaun sira hanesan PNTL sempre iha problema, difisil iha instituisaun ho ema barak para bele kontrola buat hotu-hotu. Hanesan iha rai barak ne’ebé esperiénsia liu ho meius di’ak liu Timor-Leste nian, sira mós enfrenta problema grave kuantu mais Timor-Leste nian ne’ebé ho situasaun PNTL nian iha limitasaun oin-oi, maibé bele orgullu tanba iha balansu ne’ebé halo hodi mantein profisionalidade instituisionál.

Tenke Tau mós Importánsia Bá Igualdade Jéneru

PR Ramos-Horta vizita Kuartál Jerál PNTL. Foto/Hatutan.com

“Buat ida ne’ebé ha’u la gosta iha PNTL mak kuaze feto laiha iha lideransa no ha’u hatete ona katak ha’u hakarak haree la’ós feto aumenta númeru iha PNTL bá iha baze, maibé ha’u hakarak haree feto Komandante iha PNTL,” Ramos-Horta kestiona.

Nia subliña ida la’ós responsabilidade Komandante Jerál PNTL nian tanba kada Komandu Jerál ida nia mandatu tinan haat de’it portantu ho ida ne’e nia labele muda buat barak mais tinan 20 ona ema hotu hakarak haree aselera dezenvolvimentu no kapasitasaun feto ba Komandante.

Sei Laiha Intervensaun Polítika iha Instituisaun PNTL

Prezidente Repúblika (PR), José Ramos-Horta mós afirma sei laiha influensia no intervensaun polítika iha instituisaun Polísia Nasionál Timor Leste (PNTL) tamba lider hotu hatene prinsípiu no regra orgánika servisu seguransa nian.

Ramos-Horta hateten, PNTL nu’udár instituisaun ida ne’ebé independente labele iha presaun polítika, labele iha rekizitu polítika partidária atu nomeia ema iha PNTL atu sira bele iha vontade servisu profisionál tuir lei Timor-Leste nian no estatutu PNTL.

“Ha’u fiar katak laiha interferénsia polítika iha instituisaun PNTL nia laran,” José Ramos-Horta hateten.

Xefe Estadu hatutan instituisaun  PNTL sira atualizadu tebe-tebes no sira nia sistema mós modernizadu iha Komandu no la’ós hanesan uluk no oras ne’e sira akompaña situasaun ka akontesimentu iha munisípiu sira no iha fronteira liu husi sistema elektronika.

Sei Haree Estatutu PNTL Molok Promulga

Xefe Estadu ne’e  hateten estatutu PNTL foin hetan aprovasaun iha Konsellu Ministru no nia parte seidauk simu. “Ha’u sei simu no haree lai no lee lai, ha’u la hatene bele promulga ka lae, no liu-liu ha’u sei haree iha ne’ebá iha referénsia ruma bá jeneder equality ka lae no se jender equality laiha ha’u sei haruka bá Governu mai PNTL atu haree hikas,” José Ramos-Horta subliña.

Jornalista: Vito Salvadór