Polísia Militár Kontinua Patrulla Kontrola Mós Forsa Sira Mete Arte-Marsiál

Hatuta.com, (16 Setembru 2022), Díli-Xefe Estadu Maiór FALINTIL-Forsa Defeza Timor Leste (F-FDTL), Tenente Jenerál Falur Rate Laek, hateten operasaun konjunta entre F-FDTL ho Polísia Nasionál Timor Leste (PNTL) termina ona, maibé Komandu F-FDTL nafatin orienta atu Polísia Militar (PM) kontinua patrulla hodi asegura labele mosu distúrbiu iha komunidade nia leet.

Lee Mós : Operasaun Konjunta F-FDTL ho PNTL “La Halimar” ho Kriminozu

Xefe Estadu Maiór FALINTIL-Forsa Defeza Timor Leste (F-FDTL), Tenente Jenerál Falur Rate Laek. Foto/Elio dos Santos da Costa

Tenente Jenerál Falur Rate Laek ba jornalista sira hafoin hasoru malu ho Prezidente Repúblika José Ramos-Ramos-Horta iha Palásiu Prezidensiál, Sesta (16/09/2022) hateten, nia parte partilla mós informasaun situasaun atuál iha rai laran bá Xefe Estadu no husu opiniaun Prezidente Repúblika nian atu oinsá  mantein operasionál forsa nian, kontrola forsa sira atu labele indixiplina, labele halo problema ho populasaun.

Kona-bá operasaun konjunta F-FDTL no PNTL remata ona, hein atu halo relatóriu de’it no avaliasaun no bainhira situasaun ameasadu, operasaun konjunta kontinua no karik situasaun kalma ona operasaun konjunta para.

“Ita hatene katak atividade seguransa liu-liu PNTL nian iha oras 24 kontinua hodi asegura situasaun seguransa iha rai laran no F-FDTL fó apoiu, maibé Forsa Polísia Militár F-FDTL nian patrulla kontinua atu bele kontrola militár sira labele sira la’o tun, la’o sa’e,  bá mete tun sa’e arte-marsiál sira, labele ema tuda malu tama iha klaran,” Falur Rate Laek hateten.

Atu evita ema sivíl baku militár, ema hotu-hotu tenke iha konsiénsia no edukasaun di’ak hodi respeita malu no liu-liu populasaun sivíl sira mós labele baku malu tun-sa’e, arte-marsiál labele baku malu.

“Forsa sira mós labele ba baku arbiru ema sivíl, no ema sivíl mós labele naran baku ema arbiru, inklui ho polísia sira mós nune’e, hotu-hotu tenke respeita malu,” Falur tenik.

Iha sorumutuk ne’e, Prezidente Repúblika José Ramos-Horta husu atu forsa F-FDTL mantein operasaun forsa nian, mantein kontrola disiplina forsa nian, atu labele halo problema sosiál ho komunidade sira.

Jornalista : Vito Salvadór