Defeza & Seguransa
Komandu PNTL Sei Demite Membru Faltozu Na’in-rua
Hatutan.com, (26 Outubru 2022), Díli—Komandu Jerál Polísia Nasionál Timor-Leste (PNTL), liuhosi Konsellu Superiór, planeia ona atu demite membru na’in-rua hosi instituisaun, tanba faltadór serbisu.
Membru Polísia Nasionál Timor Leste (PNTL) hosi Bataliaun Orden Publika (BOP) organiza formatura jerál hodi hala’o patrullamentu konjunta iha Dili, Sesta (09/09/2022). Foto/Elio dos Santos da Costa.
Inspetór Jerál Komandu PNTL, Superintendente Xefe Polísia, Carlos Jerónimo informa, membru na’in-rua ne’ebé oras-ne’e komandu tetu hela sira-nia destinu bá demisaun ne’e ho deviza Ajente Xefe no Ajente Normál, maibé la temi identidade.
“Sira ne’e kona-bá falta serbisu ne’ebé liu ona. Tuir loloos, falta normál ne’e dala-ida, dala-rua, balun to’o iha 120 dias. Entaun, liu ona normál. Nune’e ohin sira aprezenta kazu ne’e mai no ita halo diskusaun,” Superintendente Xefe Polísia, Carlos Jerónimo hateten hafoin sorumutu entre membru no Konsellu Superiór PNTL iha Kuartél Jerál Caicoli, Kuarta (26/10/2022).
Komandante Carlos Jerónimo dehan, desizaun saida de’it mak komandu atu foti sempre la’o tuir regra sira mak hatuur ona iha Regulamentu Disiplinár Militár (RDM) nian, ne’ebé mak prosesu hotu liuhosi Departamentu Justisa PNTL hodi prepara no aprezenta bá Konsellu Superiór.
“Konsellu superiór aprezenta bá membru Konsellu sira atu haree, tetu, ida ne’ebé mak serve bá demisaun,” Carlos Jerónimo hateten.
Bainhira Konsellu Superiór konklui ona diskusaun, maka komandu sei halo proposta hodi aprezenta bá iha Ministériu Defeza no Seguransa atu bele foti desizaun ba membru na’in-rua ne’ebé ida serbisu hela iha Komandu Jerál no ida seluk iha munisípiu.
Durante sorumtu entre Konsellu Superiór PNTL, diskute mós asuntu balun liu-liu kona-bá situasaun dezenvolvimentu institusionál inklui prespetiva kona-bá estatutu PNTL nian.
Jornalista: Rogério Pereira Cárceres