Ekonomia
Introdusaun Impostu iha Proposta OJE 2023, Governu Hakarak Hasa’e Reseita Dométika
Hatutan.com, (29 Outubru 2022), Díli—Governu komprometidu hakarak Hasa’e reseita dométika, nune’e introdus ona impostu iha Proposta Orsamentu Jeral Estadu (OJE) 2023.
Foto Google.
Tanba ne’e, tinan 2023 liuhosi Proposta OJE 2023, Governu propoin ba Parlamentu Nasionál atu introdús impostu seletivu konsumu foun ne’ebé inklui:
✅️ 10% impostu ba karreta ho valór liu $10.000
✅️ 20% ba karreta ho valór liu $25.000
✅️ 30% ba karreta ho valór liu $50.000
✅ ️Aumentu iha impostu konsumu ba tabaku no produtu tabaku seluk hosi $50 kada kilograma sa’e ba $100 kada kilograma
✅ ️Impostu konsumu foun $1.00 kada kilograma ba masi-midar
✅ ️Introdusaun impostu konsumu foun ho valór $3 kada litru ba bebida asukarada (Fanta, Coca-Cola, Sunkist, Sprite no sst). Ida-ne’e Governu introdus atu proteje sidadaun sira nia saúde públiku.
Aleinde ne’e, Governu mós propoin atu hasa’e impostu importasaun (Import Duty) husi 2,5% ba 5%.
“Liuhosi introdusaun impostu hirak-ne’e, Governu halo projesaun katak reseitas doméstika sei sa’e hosi millaun $153,7 iha 2022, ba millaun $174,9 iha 2023,” Hatutan.com sita komunikadu.
Introdusaun impostu hirak ne’e sai nu’udár instrumentu fiskál ida ne’ebé Governu uza atu hasa’e koleksaun reseitas doméstika iha tinan hirak tuir-mai hodi redús dependénsia ba Fundu Minarai.
Introdusaun Impostu hirak ne’e mós aliña ho Polítika Reforma Fiskál no Jestaun Finansas Publikas – ajenda Reforma importante ida ne’ebé inísia ona hosi Sestu Governu Konstitusionál iha tinan 2015 no Oitavu Governu Konstitusionál lideradu hosi Primeiru-Ministru, Taur Matan Ruak ne’ebé komprometidu atu kontinua implementa.
Atu hasa’e koleksaun reseitas doméstika, desde 2018 Oitavu Governu Konstitusionál liuhosi Ministériu Finansas halo ona modernizasaun ba sistema Administrasaun Tributária.
Ezemplu, lansa ona Sistema R-Timor iha tinan 2018; Lansa ona Plataforma online 𝑒-𝑆𝑒𝑟𝑣𝑖𝑐𝑒𝑠 iha Outubru 2019; Lansa 𝑒-𝑅𝑒𝑞𝑢𝑒𝑠𝑡 iha Jullu 2020; Automatizasaun 𝐶𝑒𝑟𝑡𝑖𝑑𝑎̃𝑜 𝑑𝑒 𝐷𝑖́𝑣𝑖𝑑𝑎𝑠 iha tinan 2020; Introdusaun 𝐴𝑑𝑣𝑎𝑛𝑐𝑒 𝑇𝑟𝑎𝑐𝑘𝑖𝑛𝑔 & 𝐼𝑛𝑣𝑜𝑖𝑐𝑒 𝑇𝑟𝑎𝑐𝑘𝑖𝑛𝑔 iha Sistema GRP ne’ebé implementa ona desde 2021; iha Marsu 2021, Lansa ona plataforma eletróniku ba pagamentu impostu liuhusi mákina ATM P24; Lansa sistema administrasaun Tributária SIGTAS Versaun 3 iha 28 Novembru 2021.
Jornalista: Rogério Pereira Cárceres