Kazu Instalasaun Set-Top Box RTTL,E.P, CAC Notifika MAPKOMS Nia Oan-mane Hanesan Sasin

Hatutan.com, (01 Fevereiru 2023), Díli—Comissão Anti Corrupção (CAC), halo investigasaun bá oan-mane hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ligadu ho kazu projetu instalasaun Set-Top Box, Rádiu Televizaun Timor-Leste, Empréza Públika (RTTL,E.P), ne’ebé lori prejuízu bá Estadu ho montante orsamentu $7,680.00. 

CAC halo investigasaun bá oan-mane hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ligadu ho kazu projetu instalasaun Set-Top Box, Rádiu Televizaun Timor-Leste, Empréza Públika (RTTL,E.P), Kuarta (01/02/2023). Foto/repro.

Informasaun ne’ebé Hatutan.com asesu, CAC notifika MAPKOMS nia oan mane hanesan sasin bá kazu Set-Top Box ne’ebé ninia aman komete.

Lee Mós: Kazu Projetu Instalasaun Set-top Box RTTL,E.P, Ministru MAPKOMS Konstitui Bá Arguido

Notifikasaun hosi CAC ne’e ho Númeru Único Crime (NUC) 0016/21.CACTL ho nia data investigasaun ka presta deklarasaun ba investigadór CAC iha Kuarta (01/02/2023).

Hafoin presta ka hato’o tiha nia deklarasaun no informasaun sira bá investigadór CAC nian, MAPKOMS nia oan-mane ho inisiál AEJ, rejeita atu fó komentáriu.

Iha lorom 04 Janeiru 2023, Bazeia bá prova investigasaun bá kazu projetu instalasaun  Set-Top box Rádiu Televizaun Timor Leste, Empreza Públika (RTTL,E.P), Komisaun Anti Korrupsaun (CAC, sigla portugés) konstitui Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo hosi suspeitu bá arguidu.

CAC konstitui Ministru Francisco Martins da Costa Pereira Jerónimo nu’udár arguidu tuir baze legál ka Kódigu Prosesu Penál (KPP) Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé Lei fó kompeténsia maka halo notifikasaun tuir despaixu ka ho orden ofisioza hosi sekretaria judisiál. 

Jornalista: Rogério Pereira Cárceres