Primeiru-Ministru La Mai Hasoru Prezidente Repúblika iha Palásiu Prezidensiál

Hatutan.com, (23 Fevereiru 2023), Díli—Enkontru semanál entre Prezidente Repúblika (PR), José Ramos-Horta ho Primeiru-Ministru (PM), Taur Matan Ruak, kansela derrepente no laiha informasaun klaru.

Lee Mós : Buska bá Rezidénsia Longuinhos, Primeiru-Ministru Simu Asaun Rua hosi Prezidente Repúblika

PR Horta ho PM Taur sae karreta hamutuk hodi halo viajen bá Ermera, Sábadu (09/07/2022). Foto/Foti husi Facebook

Tuir ajenda Prezidente Repúblika nian, iha loron 23 fulan-Fevereiru 2023, tuku 09;30 Otl, iha enkontru semanál entre Prezidente Repúblika ho Primeiru-Ministru iha Palásiu Prezidensiál, maibé to’o nia oras no nia tempu, Primeiru-Ministru Taur Matan Ruak la mosu iha Palásiu Prezidensiál.

Jornalista sira ne’ebé destaka iha Palásiu Prezidente   buka hatene informasaun kona-bá enkontru semanál entre PR José Ramos- Horta ho Primeiru-Ministru (PM), Taur Matan Ruak, ne’ebé ajenda ona, maibé parte protokolu Prezidente Repúblika nian dehan de’it enkontru ne’e kansela.

Jornalista sira tenta nafatin atu buka hatene nia razaun kanselamentu enkontru semanál Xefe Estadu ho Xefe Governu, maibé parte protokolu sira la fó informasaun detallu, hodi dehan de’it, Primeiru-Ministru la mai no la dehan tan buat ruma.

Loron ida antes, iha Sesta, 22 fulan-Fevereiru 2023, Primeiru-Ministru (PM), Taur Matan Ruak,  bainhira to’o fali iha Timor-Leste hafoin vizita servisu bá estranjeiru, afirma bá jornalista sira iha Aeroportu Internasionál Prezidente Nicolau Lobato, katak nia simu hotu asaun  rua hosi Prezidente Repúblika (PR), José Ramos-Horta, relasiona ho mandadu buska no aprrensaun bá rezidénsia  Longunihos Monteiro atuál asesór prinsipál Prezidente Repúblika nian.

Asaun rua (2) ne’ebé Prezidente Repúblika sei foti hasoru Primeiru-Ministru relasiona ho buska no apreensaun bá  rezidénsia Longunihos Monteiro nian hosi ekipa Servisu Nasionál Intelijensia (SNI) ho Polísia Sientífika Investigasaun Kriminál (PCIC, sigla portugés), mak hanesan; ida) denunsia bá públiku no ida seluk (rua) hapara enkontru semanál ho Primeiru-Ministru.

“Ha’u iha aviaun laran ha’u responde bá Senór Ministru hateten bá Prezidente rua ne’e ha’u simu hotu, denunsia bá públiku no hapara enkontru semanal ho Primeiru-Ministru mós ha’u simu,” Primeiru-Ministru (PM), Taur Matan Ruak haktuir bá jornalista sira iha aeroportu internasionál prezidente Nicolau Lobato, Díli.

Primeiru-Ministru (PM), Taur Matan Ruak to’o iha Aeroportu Prezidente Nicolau Lobato, Comoro, Díli, ho aviaun komersiál Batik Air.

Ajenda Enkontru Prezidente Repúblika, Kinta-Feira, 23 Fevereiru 2023

Ajenda enkontru Prezidente Repúblika, José Ramos-Horta nian bá loron ohin, Kinta-Feira, 23 Fevereiru 2023 ne’ebé mak Hatutan.com asesu hosi Mídia Gabinete Prezidente Repúblika nian mak hanesan;

Oras 09:30 — Prezidente Repúblika, José Ramos-Horta, enkontru regular ho Primeiru-Ministru, Taur Matan Ruak, iha Palásiu Prezidensiál.

Oras 14:00 — Prezidente Repúblika, José Ramos-Horta, hetan aprezentasaun kona-ba rezultadu estudu no relatóriu ho “Open Society Foundation”, iha Palásiu Prezidensiál.

Oras 18:30 — Prezidente Repúblika, José Ramos-Horta, partisipa iha Japan’s National Day, iha Rezidénsia Embaixador (Embaixada Japaun).

Jornalista : Vito Salvadór