Hatutan.com, (08 Marsu 2023), Díli—Mundu inklui Timor-Leste komemora loron internasionál ba feto Iha 08 Marsu 2023, hodi fó rekoñesimentu ba papél no kontribuisaun feto iha dezenvolvimentu nasionál iha seitór hotu-hotu iha Timor-Leste.
Timor-Leste nu’udár nasaun demokrátiku ne’ebé respeita no promove valór igualdade no inkluzaun, kontinua tau aas direitu feto tanba ne’e kada tinan Timor-Leste selebra loron importante ne’e ba tinan ida ne’e konsagra ho tema “Feto Prontu Lidera.”
Lee Mós: JSMP Husu Ema Hotu Servisu Maka’as Redús Violénsia Bazeia Bá Jéneru
Feto Timor-Leste maioria dezenvolve-an ona, iha kapasidade no abilidade no envolve sira nia-an iha aspetu oin-oin, lidera ministériu, sai membru parlamentu, lidera departementu no organizasaun nasionál no internasionál.
“JSMP rekoñese kontribuisaun feto iha área hotu-hotu nu’udár sentrál tebes, inklui vida polítika, vida ekonomia, asesu justisa iha ita nia governu no ita ninia komunidade selebra hamutuk feto sira nia kontribuisaun, sira nia dedikasaun, sira nia luta no lideransa. Maski nune’e, atu promove valór igualidade no inkluzivu ne’ebé loloos tenke rekoñese importánsia papél feto no elimina violénsia hasoru feto no hasa’e sira nia partisipasaun iha prosesu dezenvolvimentu nasionál,” Diretora Ezekutiva JSMP Ana Paula Marçal, hateten.
Estadu Timor-Leste tinan-tinan kontinua promove no asegura direitu feto no labarik feto, introdús inisiativa oin-oin ba promosaun igualidade hodi kombate violénsia no diskriminasaun hasoru feto no labarik feto, kada tinan Estadu prevee orsamentu iha kada ministériu atu asegura hakbiit feto iha setór hotu-hotu.
Maski nune’e, feto barak iha Timor-Leste liuliu iha área rurais no urbanu balun kontinua infrenta dezigualdade no diskriminasaun no violénsia oi-oin iha sira nia moris lor-loron hosi sira nia parseiru, família, viziñu no komunidade situasaun sira ne’e kontinua akontese tanba kestaun norma sira sosiais no kultura ne’ebé sei metin iha komunidade nia hanoin.
Feto sira kontinua hasoru problema atu asesu ba justisa fórmál, dala barak feto sira la aprezenta keixa hasoru aktu krime ne’ebé sira hasoru tanba presaun hosi família, tauk fahe malu (divórsiu ka separa), tauk oan sira abandonadu no problema família sira seluk.
JSMP iha nia atividade sira ba komunidade iha fatin-fatin sempre subliña no fó hanoin ba komunidade sira atu respeita, hadomi, fó oportunidade no trata sira hanesan ita nia-an tanba sira ema hanesan mós ema mane no feto mak hun hosi moris.
Aproveita loron importante ida ne’e, JSMP hakarak kongratula feto hotu-hotu iha mundu no feto Timor-Leste no kongratula ba mane sira ne’ebé mak hahú muda ona sira nia mentalidade no norma no kultura dezigualidade sira hodi respeita, hadomi, fó oportunidade ba feto iha sira idak-idak nia família, komunidade, sosiedade no lori mudansa ba feto sira.
Jornalista: Vito Salvadór
