Hatutan.com, (15 Marsu 2023), Díli— Konsellu Ministru (KM) iha Kuarta ne’e aprova projetu Rezolusaun Governu, aprezenta hosi Ministru Interiór (MI) kona-bá nomeasaun ba Superintendente-Xefe Henrique da Costa atu ezerse kargu Komandante-Jerál Polísia Nasionál Timor-Leste (PNTL), ba períodu tinan tolu, tanba ne’e, pomove ba Komisáriu-Jerál.
Komandante Jerál PNTL, Superintendente-Xefe Henrique da Costa ho Segundu Komandante Superintendente-Xefe Pedro Belo. Foto/Elio dos Santos da Costa.
“Ho Rezolusaun ida-ne’e, nune’e hapara komisaun servisu atuál komandante-Jerál PNTL, komisáriu Faustino da Costa,” Hatutan.com sita komunikadu.
Lee Mós: Koñese Deviza PNTL no Formasaun atu Lidera Eskuadra to’o Komisáriu
Alende ne’e, Konsellu Ministru aprova mós projetu Rezolusaun Governu, ne’ebé mós aprezenta hosi Ministru Interiór, hodi nomeia Superintendente-Xefe Pedro Belo atu ezerse kargu nu’udár Segundu Komandante-Jerál PNTL, ba períodu tinan tolu, ho nune’e promove bá Komisáriu.
Ho Rezolusaun Governu nian ida-ne’e hapara mós komisaun servisu Komisáriu Mateus Fernandes.
Antes ne’e, Superintendente-Xefe Henrique da Costa hanesan Komandante Pessoál ho Formasaun PNTL no Superintendente-Xefe Pedro Belo antes ne’e hanesan Komandante Operasaun nasionál.
Jornalista: Rogério Perreira Cárceres