Edukasaun
Reklamante 3.000-resin, MEJD Verifika Hela Professór Voluntáriu “Mate-Klamar”
Hatutan.com, (11 Abríl 2023), Díli—Ministériu Edukasaun Juventude no Desportu (MEJD) simu ona professór voluntáriu na’in 3.000-resin ne’ebé halo reklamasaun, tanba la pasa iha vaga kontratadu ne’ebé anunsia iha Tersa 14 Fevereiru 2023.
Professór voluntáriu atus-ida-resin hosi Munisipiu Díli ezíje sira-nia direitu bá MEJD, iha Tersa (14/02/2023).
Maski nune’e, Ministru Edukasaun Juventude no Desportu, Armindo Maia dehan MEJD seidauk bele foti desizaun tanba sei halo hela verifikasaun ba lista ka naran balun ne’ebé konsidera hanesan professór “mate klamar”.
Lee Mós: Governu Kontrata Professór Voluntáriu 1.715 Hamosu Insatisfasaun
“Reklamasaun balun mate-klamar. Ne’ebé ita tenke verifika. Ita haruka ona ekipa tun bá halo, reverifikasaun iha kraik, atu haree loos ka la’e. Tanba sira balun naran iha, maibé, mate-klamar. Entaun, ida-ne’e tenke verifika hotu,” Armindo Maia hateten hafoin sorumutu ho Primeiru Ministru (PM), Taur Matan Ruak, iha Palásiu Governu, Tersa (11/04/2023).
Armindo Maia esplika, durante ne’e MEJD kategoriza profesór sira iha kategória tolu mak hanesan, sira ne’ebé permanente, Funsionáriu Públiku no Sira ne’ebé kontratadu.
Sira voluntáriu hahú kedan iha tinan 2014 to’o ohin loron, sira hetan kontratu kada tinan ho ministériu, no ministériu tau iha orsamentu Saláriu no Vensimentu.
Tanba ne’e maka Ministériu loke vaga hodi halo kontratu no iha Tersa (14/02/2023), ofisialmente anúnsia totál vaga professór voluntáriu ne’ebé selesionadu atu asina kontratu hamutuk 1.715.
Rezultadu ne’e hamosu kedan insatisfasaun hosi professór voluntáriu atus-ida-resin hosi Munisipiu Díli ne’ebé ezíje sira-nia direitu bá MEJD, tanba durante ne’e hanorin ho voluntáriu de’it, maibé iha rezultadu rekrutamentu sira-nia naran la tama iha lista kontratadu.
Hatán bá lementasaun hirak ne’e, iha altura neebá kedan, MEJD liuhosi Ministru Armindo Maia, husu professór voluntáriu sira ne’ebé naran la tama iha lista ne’e, atu subemete ka hatama fila-fali sira-ninia karta reklamasaun, nune’e ekipa ministériu nian bele verifika, avalia no foti desizaun.
To’o oras-ne’e, totál reklamasaun ne’ebé MEJD simu hosi Professór Voluntáriu sira hamutuk 3.000-resin, nu’udár aktu protestu ida, hodi “reklama sira-ninia direitu” bá ministériu.
Vagas ne’ebé MEJD iha maka 2.300 nune’e Armindo Maia dehan, iha segunda faze nian sei hasai tiha 1.700, no vagas ne’e sei iha tán 600 ka 700 ne’ebé reklamante balun hosi númeru 3.000-resin ne’e mak sei bele priénxe.
Jornalista: Rogério Pereira Cárceres