Xanana Apela bá Simpatizante ho Militante CNRT Kontribui bá Pás

Hatutan.com, (22 Abríl 2023), Viqueque- Prezidente Partidu Congresso Nasionál Reconstrução Timorense (CNRT), Kay Rala Xanana Gusmão, apela bá militante no simpatizante sira hotu iha Munisípiu Viqueque no mós iha munisipiu sira seluk iha territóriu nasionál atu mantein kalma hodi kontribui bá pás.

Lee Mós : Hafoin Kampaña Iha Viqueque, Militante CNRT Hetan Tuda Hosi Ema Deskoñesidu

Xanana dehan, maske ema balun hanoin at bá CNRT no tenta halo instabilidade, maibé CNRT la bele monu bá provokasaun sira-ne’e.

Kay Rala Xanana Gusmão hato’o lia hirak ne’e hodi solidariza militante Egídio da Silva Ximenes ne’ebé hetan tuda hosi ema deskoñesidu hafoin  partisipa kampaña Partidu CNRT  nian iha kampu futeból Beloi, Munisípiu Viqueque, Sesta (21/04/2023).

Xanana haree hela vítima Egidio da Silva Ximenes ne’ebé hetan tuda hosi ema deskoñesidu, Sesta kalan iha Viqueque. Foto/Vito Salvadór

Prezidente Partidu CNRT, Kay Rala Xanana Gusmão, sente triste ho akontesimentu ne’e no apela ba militante CNRT iha Viqueuqe no munisípiu hotu mantein paz no dame hodi kontribui bá estabilidade iha Timor-Leste.

“Há’u husu imi mantein pás, lalika provoka situasaun, ita hakmatek nafatin hodi kontribui dame bá ita-nia eleisaun bele la’o ho di’ak,” Kay Rala Xanana Gusmão haktuir bá jornalista sira iha Postu Administrativu Ossu, Munisípiu Viqueque, Sábadu (22/04/2023).

Iha fatin hanesan vítima Egídio da Silva Ximenes hateten hafoin hamutuk ho nia kolega na’in-hitu sa’e karreta hosi Viqueque atu fila ba sira-nia fatin Ossu, hale’u tuku 18:40 Otl, derrepente iha dalan, haree militante partidu balun uza atributu kesi metin iha kakorok kaer hela fatuk iha foho leten lansa tuda hasoru sira iha dalan.

Akontesimentu ne’e rezulta vitima nia ulun hetan kanek suku pontu tolu no suspeitu halai lakon no vitima nia kolega sira lori kedas bá hala’o tratamentu saúde iha Klinika Ossu.

“Ami fila mai too Postu Administrativu Ossu no too iha área Loihunu kuaze tuku 19:00 Otl no iha karreta laran ema hamutuk ema na’in hitu, no ema tuda kona há’u nia ulun, há’u haree ema ne’ebé tuda uza atributu partidu seluk nian halai sa’e kedas ba foho lolon,” Egídio haktuir bá Xanana iha Ossu.

Hafoin akontesimentu, vitima ho kolega sira aprezenta kedas keixa bá parte PNTL Ossu nian hodi relata ba Komandu PNTL Munisípiu Viqueque.

Koordenadór Partidu CNRT Munisípiu Viqueque, Anacleto Freitas mós apela ba militante hotu- hotu tuur hakmatek no labele kria problema.

“Maski ami nia militante ida kanek, maibé ba to’o ospitál konsege hetan ona tratamentu hosi médiku sira. Akontesimentu ne’ebé iha, ita sei perdua no husu bá militante sira atu kontinua kria pás,” Anacleto hateten.

Komandante PNTL Munisípiu Viqueque, Superintendente Xefe Sebastião Alves Quintão kontinua koordena ho komandu F-FDTL garante nafatin situasaun seguransa  la’o hakmatek durante períodu kampaña to’o eleisaun iha loron 21 fulan-Maiu 2023.

Jornalista: Vito Salvadór