FRETILIN Tenke iha Kapasidade Hametin Unidade Nasionál

Hatutan.com, (23 Abríl 2023), Covalima-Partidu Frente Revolusionáriu Timor-Leste Independente (FRETILIN), iha loron 23 fulan-Abríl, realiza  ninia kampaña ho tipu komísiu bá dala-tolu nian, iha kampu Futeból Ladi, Suku Madeu, Postu Administrativu Suai Villa, Munisípiu Covalima. Iha intervensaun polítika, Sekretáriu Jerál FRETILIN, Marí Alkatiri hateten, FRETILIN tenke iha kapasidade atu bele bá hametin unidade nasionál.

Lee Mós : Alkatiri: Ikus-Ikus Ne’e Governu Sai Fali Hanesan Bazar

Partidu FRETILIN realiza kampaña ho tipu komísiu iha kampu Futeból Ladi, Munisípiu Covalima, Domingu (23/4/2023). Foto/Rogério Pereira Cárceres

“Imi foin rona múzika ida furak tebetebes. Agora ha’u atu ko’alia para dehan, bainhira FRETILIN manán, atu halo saida? Naroman bá Povu ne’e, servisu boot ida ita tenke halo. Primeiru, FRETILIN tenke iha kapasidade, atu hametin unidade nasionál,” Marí Alkatiri hateten iha intervensaun.  

Tuir Alkatiri, hametin unidade nasionál, hanesan dalan ida, atu lori dezenvolvimentu ka bele dehan progresu bá rai ida-ne’e. tanba tuir Mari Alkatiri, laiha unidade nasionál, Laiha dezenvolvimentu, no laiha progresu.

“Ne’e mak, ita liu tiha tinan 20 resin, progresu laiha, dezenvolvimentu laiha, povu halerik nafatin. Tanba ita ukun kontra malu, diskrimina malu. Tanba ne’e, primeiru, unidade para progresu,” Alkatiri hateten.

Unidade para progresu atu bele hametin timoroan nia hanoin, hametin timoroan nia hakarak, atu bele kompriende didi’ak prosesu tomak. Unidade para progresu, para ema hotu bele atu hateke bá kotuk. Bele hanoin nafatin bá kotuk, maibé tenke iha vizaun ho misaun atu hateke no la’o bá oin.

Iha pontu segundu, Alkatiri hatutan, FRETILIN sei halo dezenvolvimentu ekonómiku ida, atu fó dignidade bá ema hotu. Ema hothotu tenke iha direitu, atu moris ho dignu. Atu moris ho kondisaun ida ne’ebé bele haburas sira-nia vida, hanaruk sira-nia vida.

Haburas no hanaruk ekonomia família nian, ekonomia komunidade nian, ekonomia Timor-Leste nian atu la’o bá oin, no realiza pontu rua ne’e no iha pontu tolu tenke iha juventude ida dinámiku no produtivu.

Kampaña komisu partidu FRETILIN iha Covalima, Domingu (23/4/2023). Foto/Rogério Pereira Cárceres

Prezidente bá lideransa Troika FRETILIN nian ne’e perante militante sira, kompromete katak, uainhira FRETILIN fila bá ukun, sei halo buat hothotu, hodi hametin unidade nasionál.

“FRETILIN sei halo buat hothotu, para atu hametin unidade. Unidade la’ós dehan kontra demokrasia, unidade para atu hametin estadu ida ne’e, para ita atu la’o bá oin, atu harii nasaun,” Alkatiri promete.

Kampaña komísiu ne’e hahú iha tuku 14:27 otl no ensera iha tuku 16:34, loro-kraik, no partisipa másimu hosi militante sira, hosi Postu Administrativu Suai Villa, Maucatar, Zumalai, Fohorem, Fatumea, Tilomar, Fatulilik.

Komísiu ne’e la akontese insidente ruma, no hetan observasaun direta hosi Ofisial Supervizaun Eleitorál (OSE) sira Comissão Nacional de Eleições (CNE) no asegura hosi membru PNTL sira iha Munisipiu Covalima.

Jornalista: Rogério Pereira Cárceres