Dili
Kampaña Ikus KHUNTO, Naimori Husu Deskulpa Bá Líder Nasionál Sira, Parpól no Públiku
Hatutan.com, (12 Maiu 2023), Díli—Kampaña ikus Partidu Kmanek Haburas Unidade Nasionál Timor Oan (KHUNTO), iha Tasi-tolu, Dili, Konselleiru másimu, José dos Santos Naimori Bucar, husu deskulpa bá Prezidente partidu Congresso Nacional Reconstrucção de Timor-Leste (CNRT), Kay Rala Xanana Gusmão, Prezidente Repúblika (PR), Ramos-Horta, líder nasionál sira, veteranu sira, líder partidu poltiku ho idaidak ninia militante sira no públiku tomak.
Kampaña ikus Partidu Kmanek Haburas Unidade Nasionál Timor Oan (KHUNTO), Konselleiru másimu, José dos Santos Naimori Bucar husu deskulpa iha palku leten Tasi-tolu, Díli, Sesta (12/05/2023). Foto/Hatutan.com repro.
Naimori Bucar husu deskulpa ne’e tanba ‘rekoñese’ durante kampaña hale’u munisipiu, iha deklarasaun polítika balun ne’ebé ladún fó satisfasaun, hanesan ema sala na’in rekoñese no husu perdaun tanba natureza palku polítika mak nune’e ona.
Lee Mós:KHUNTO Lakohi Povu Hela Nafatin Iha Uma Duut Ho Piku
“Ha’u lori militante hotu-hotu partidu KHUNTO nian, estrutura hosi nasionál to’o iha aldeia husu deskulpa. Durante kampaña hahú hosi 19 Abríl ami ko’alia lia-fuan ne’ebé todan, lia-fuan ne’ebé la monu bá ami nia aman sira-nia laran, bá povu Timor-Leste, bá maun-alin sira hotu, tanba polítika hanorin ita sa’e palku ita hotu-hotu tenke defende ida-idak nia direitu, iha partidu, tanba partidu hotu-hotu hanesan,” Naimori Bucar husu deskulpa iha palku leten Tasi-tolu, Díli, Sesta (12/05/2023).
Naimori rekoñese Xanana Gusmão, Ramos-Horta no veteranu sira nu’udár líder nasionál, nu’udár aman no fundadór, lori luta, lori nasaun ne’e bá oin hodi liberta rai ida-ne’e, ikus liu atu liberta povu ida-ne’e.
“Bá aman Xanana, bá veteranu sira, maun sira hotu, bá Prezidente maun Ramos-Horta. Tanba partidu, ita-boot sira fó liberdade bá ami, ohin loron sa’e iha palku, ami mós lakohi halo ami nia partidu lakon. Tanba dala-ruma, liafuan ruma todan, ha’u rasik husu deskulpa no bá ha’u nia maun sira hotu. Ha’u imi nia oan, ha’u imi nia alin no ha’u imi-nia beioan,” Naimori rekoñese.
Konsilleiru másimu ne’e fó-hanoin bá militante, apoiante no simpatizante sira katak, kampaña KHUNTO nian remata ona, husu atu aban bá oin, hotu-hotu akompaña fali partidu 16 seluk ninia atividade, tanba sira seidauk hotu. Husu atu respeita partidu sira ne’e, atu hatudu de’it bá Timor laran katak, sira iha KHUNTO bele, no KHUNTO prepara ona, katak, sira bele lori nasaun ne’e bá oin.
Jornalista: Rogério Pereira Cárceres