Alkatiri: FRETILIN Mak Tenke Lidera Governu da-Sia

Hatutan.com, (14 Maiu 2023), Viqueque-Sekretáriu Jerál Partidu FRETILIN, Marí Alkatiri hateten,  FRETILIN mak tenke lidera Governu da-sia (2023-2028) atu halakon númeru korrupsaun iha Timor-Leste.   

Lee Mós : FRETILIN Tenke iha Kapasidade Hametin Unidade Nasionál

Sekretáriu Jerál FRETILIN, Mari Alkatiri. Foto/Elio dos Santos da Costa

“Korrupsaun menus bá bebeik iha Governu da-ualu ne’e. Signifika saida, katak Fretilin manán lidera governu, rai ne’e sei diferente liu. Uluk kedas hatudu ona. Maibé, presiza atu manán, ita mak tenke lidera governu. Tanba agora, ita viabiliza partidu seluk nia governu. Biar nune’e, ita tama ona, ita hatudu ona,” Marí Alkatiri hateten durante intervensaun iha komísiu FRETILIN nian iha Kampu Futebool Beloi, Postu Administrativu Viqueque Villa, Domingu (14/05/2023). 

Prezidente lideransa Troika FRETILIN ne’e hatutan, ema balu dehan, Governu ida ne’e, la halo buat ida. Maibé, Alkatiri dehan la presiza atu hatán bá ida ne’e tanba povu sente ona saida mak uma naroman bá povu. Povu haree ho nia matan, povu kaer ho nia liman, saida mak uma naroman bá povu.

Alkatiri hateten, povu hatene ona katak, ho ai-hán sesta bázika sei iha, jestaun seidauk di’ak 100%, jestaun sei sala. Maibé, sesta bázika ne’e mak lori povu natar-na’in, toos-na’in, ninia produtu sira atu hetan folin fali.

Povu hakiak animál, produtu folin sa’e. Signifika, povu hatudu katak, bainhira nia produtu iha folin, povu mós hatene servisu.

Marí Alkatiri promete tán katak, bainhira FRETILIN  hetan vitória iha eleisaun parlamentár tinan ne’e, fila bá Governu, buat ne’ebé atu hadi’a primeiru maka, sai estadu de direitu demokrátiku.

Signifika katak, prezidente repúblika iha nia kompeténsia, parlamentu nia kompeténsia rasik. Governu ho parlamentu tenke iha relasaun ida interativa boot tebes. Tanba parlamentu aprova  programa sira, aprova lei sira, governu mak ezekuta.

“Tau tiha ema bá primeiru ministru, depois hatun. Tau tiha ema bá prezidente, depois hatun. Laiha ema ida ke bele sente katak nia iha estadu nia leten. Laiha mós partidu ida bele sente katak, nia iha estadu nia leten,” Alkatiri hateten.

Tuir Alkatiri, partidu eziste, para sai riin Estadu nian, iha povu nia leet. La’ós kontra fali Estadu. Polítika anti estadu, labele iha Timor. Tanba ne’e, Alkatiri dehan, FRETILIN tenke hadi’a hotu.

Marí Alkatiri fó hanoin katak, justisa tenke garante katak, nasaun ida ne’e livre hosi korrupsaun. Tenke hamoos korrupsaun hosi povu nia leet. Governu sai de’it mak mai, tenke tau iha ninia programa bá kombate korrupsaun nian.

Jornalista: Rogério Pereira Cárceres